entrevista

Carmela Sánchez Carreira asina xunto a José Manuel Amoedo o traballo de investigación 'Os efectos iniciais da Covid-19 nas desigualdades de renda na Galiza e a súa distribución na sociedade', galardoado co Premio Valentín Paz Andrade de Economía; un traballo con implicacións políticas e sociais que  achega coñecemento ás políticas públicas.

Suso Coba, máis coñecido como 'Suso do Dezaseis' é o dono do Dezaseis, un respectado estabelecemento hostaleiro compostelán de case 30 anos de historia. O próximo 23 de febreiro, día dedicado na Galiza á conmemoración de Rosalía de Castro, Coba será, xunto coa cantora Uxía Senlle, quen elaborará na Casa-Museo da emblemática poeta o Caldo de Gloria. Unha actividade impulsada pola Fundación Rosalía de Castro para homenaxear a autora desde o mundo gastronómico.

Son pouco máis de 300 as mulleres que practican loita libre de forma federada na Galiza, pero o pequeno da cifra é inversamente proporcional aos éxitos que logran referentes como Nerea Pampín ou Lydia Pérez (Pontevedra, 1997), quen conversa con Nós Diario sobre uns soños olímpicos que pasan por París.

Rosa de Cabanas (Ouzande, A Estrada, Terra de Montes, 1976) é ilustradora e arquitecta. Unha das súas creacións, en homenaxe a Rosalía de Castro, ilustrará a capa do especial que este 23 de febreiro acompañará 'Nós Diario' para conmemorar o 187º aniversario do nacemento da poeta.

Brais Vázquez (Carballedo, Lugo, 1999), coñecido como Torozas, é un dos integrantes de TIAM Gz xunto con Iago Suárez, ‘Iagueiro’; Álex Varela, ‘Alessov’, e Matías Zelarayán, ‘Mr. Mati’. O grupo vén de publicar un novo sinxelo, Volta ao xogo, acompañado dun videoclip para facer toda unha declaración de intencións con respecto a súa volta á música cun futuro EP.

O músico e tamén psiquiatra Antón Seoane (Ferrol, 1949) publica 'Avelino Cabezas e os seus irmáns' (Galaxia). O libro, que se somerxe na súa propia estirpe, conta a asombrosa historia da emigración na Arxentina de primeiros do século XX deste grupo familiar que edificou en Bos Aires unha enorme empresa comercial, pioneira do marketing e da publicidade. Aínda pasados cen anos, a historia da saga Cabezas reverbera na casa Libunca (Narón) e na finca El Paraíso (Córdoba-Arxentina), residencia final do escritor Manuel Mujica Láinez.

A candidata do BNG máis cercana fala con 'Nós Diario' dos seus gustos persoais.

En 2016, as enquisas non lle garantían grupo parlamentario propio ao BNG encabezado por Ana Pontón. O 18-F a Presidencia vaise dirimir entre o BNG e o PP. "É un traballo colectivo", contesta cando lle preguntamos sobre o ascenso meteórico do BNG.

Inés San Luís (Compostela, 1997), enxeñeira informática, é a creadora de Vogal, unha plataforma para descubrir series e películas en versión orixinal galega así como as plataformas onde se poden desfrutar.

Gisela Mato (Xenebra, Suíza, 1978), escritora e psicóloga, vén de ser galardoada co Premio Manuel Lueiro Rey de Poesía, convocado polo Concello de Fornelos de Montes (comarca de Vigo), pola súa obra 'Habitar as fendas', onde reflexiona sobre a vulnerabilidade e o sufrimento na experiencia humana.

Preguntamos á candidata número 2 do PP pola Coruña, Paula Prado, polos seus gustos persoais para que as lectoras e lectores poidan coñecela máis de perto. Gústalle cociñar? Cal é a súa película ou serie de televisión favorita? Que plan ten para un sábado calquera? Estas son as súas respostas.

Cociñeiro antes que frade, como se adoita dicir, o haltera, adestrador e agora presidente do Club Halterofilia Coruña, Francisco García (A Coruña, 1983), comanda desde os despachos os designios do conxunto máis importante do país, que, tal e como sinala con orgullo, vive "o mellor momento" de toda a súa historia.

Christian Pérez (O Carballiño, 1994) é o fotógrafo oficial do Festival Revenidas, escenario onde puido retratar o artista asturiano Rodrigo Cuevas cunha fotografía que lle valeu o nomeamento como finalista nos Iberian Festival Awards.

Vicente Blanco (Compostela, 1974), coordinador do colectivo Escola Imaxinada, é un dos promotores do proxecto O laboratorio de formas rural, xunto con Salvador Cidrás e Estella Freire. Esta iniciativa é unha das 20 seleccionadas na última convocatoria do programa Art for Change, unha iniciativa impulsada e financiada pola Obra Social La Caixa.

O candidato do PSdeG máis cercano fala con 'Nós Diario' dos seus gustos persoais.

Coñece todo canto recanto galego, portugués e ibérico en xeral, no que a máscara tradicional se mantén viva e segue organizando a xente ao seu redor. Muller de múltiples ocupacións ao longo da vida, Mercedes Vázquez Saavedra (Sarria, 1949), non só é unha fotógrafa documentalista exhaustiva, tamén recolle cunha paixón que xa chega ás catro décadas, textos e historias que lle contan arredor da máscara e ofréceas ao coñecemento público con xenerosidade.

Alba Ermida (Poio, 1990), cantante e clarinetista, integra Crúas xunto coa pianista Iria San Marcial. Este dúo nace co obxectivo de pórlle música á palabras de poetas galegas como Rosalía, Xela Arias, Olga Novo, Darío Xohán Cabana ou Luz Pozo Garza.

Armando Oxea Bouzo (Vilar de Barrio, A Limia, 1962), unha das persoas da máxima confianza do alcalde de Ourense e líder da formación pola que concorre ás eleccións ao Parlamento galego do 18 de febreiro, é concelleiro na cidade das Burgas desde 2015 e, entre 2019 e 2020, vicepresidente segundo da Deputación de Ourense, froito dun pacto co PP que incluía que DO non se presentase aos comicios galegos daquel ano pero que de cara a esta nova cita non se reeditou. Oxea, en conversa con 'Nós Diario', insiste en que a súa formación terá a chave do novo Goberno da Xunta: "Pactaremos con aquel partido ou partidos que nos garantan o máximo investimento na nosa cidade e na nosa provincia".

Marta Irene Lois González (Vigo, 1969) foi designada candidata de Sumar Galicia á Presidencia da Xunta após exercer desde agosto pasado de portavoz do grupo parlamentario no Congreso desta formación que lidera a vicepresidenta do Goberno estatal Yolanda Díaz. Da man de Sumar aspira non só a obter representación no Pazo do Hórreo, senón tamén a entrar nun hipotético goberno 'a tres bandas' con BNG e PSdeG, tal e como apunta a 'Nós Diario'. Lois foi concelleira en Santiago entre 2015 e 2023, e no primeiro mandato, da man do daquela alcalde Martiño Noriega e en representación de Compostela Aberta, foi a responsábel das áreas de Igualdade e Turismo.

Laura Rodríguez (A Coruña, 1985) exerce como asesora técnica no Museo Pedagóxico da Galiza (Mupega), onde organizan diversos obradoiros de temática mensual co obxectivo de achegar a tradición ás crianzas.