Con colo ou sen el. A dúas cores, tres ou máis. Con tonalidades de azul celeste máis claras ou escuras ou atrevéndose con cores como granate, gris ou rosa. Pero sempre, como non podía ser doutra forma, co escudo dos dous 'C' de 'Club Celta' no peito e mais, desde mediados do pasado século, coa cruz de Santiago. Cen anos dan para vestir moitos deseños diferentes, e así o fixo o Real Club Celta, que con máis ou menos acerto a ollos da bancada luciu decenas de camisetas dos máis variados estilos. Aquí facemos unha pequena escolma das máis icónicas, se ben posibelmente, como se soe dicir, nin son todas as que están, nin están todas as que son.
E ti, que opinas? Cal é a mellor camiseta do Celta ou a que evoca as mellores lembranzas para ti?Vota na nosa enquisa!
A Oliveira dos cen anos que C. Tangana compuxo para conmemorar o centenario do Celta copa todos os titulares. Porén, non é nin moito menos a única canción que rende homenaxe ao clube vigués: antes del deixaron pegada en Balaídos grupos como Keltoi! ou A Roda, e son numerosos e moi variados os artistas que quixeron dedicar uns versos ao Real Club Celta.
Para ti, cal é a mellor canción ou himno do celtismo? Vota na nosa enquisa de hoxe!
Vermello, azul mariño, azul celeste, con coroa, sen ela, coa cruz... O escudo do Celta experimentou numerosas mudanzas ao longo dos seus 100 anos de historia, tal e como se pode observar na imaxe. De feito, hai documentación gráfica que evidencia que durante algún tempo os futbolistas celestes chegaron a portar como escudo unicamente a cruz de Santiago, sen os característicos 'C' de 'Club Celta' e o seu escudo.
E ti, con cal de todas as versións quedas? Cal é o escudo máis fermoso ou que mellor representa o Celta para ti? Vota na nosa enquisa!
A Oliveira dos cen anos torna oficialmente no novo himno do Real Club Celta. Ten autoría colectiva, pois a C. Tangana sumáronse nos últimos meses, nun longo proceso de pre e pos produción, o catalán Cristian Quirante Catalán 'Alizzz' e os galegos Xosé Lois Romero, Xisco Feijóo, Quico Comesaña e Simeón Cantó Gavira 'Sime', este último un vello coñecido da parroquia celeste por ser o vocalista de Keltoi!. E na peza aprécianse as voces e as pandeiretas das Lagharteiras e Lilaina, a pegada da emblemática Coral Casablanca e a presenza tamén dos músicos Pablo Drexler e Alizzz.
