Nós Diario únese á celebración do centenario do Real Club Celta de Vigo, e faino dándolle a palabra no soporte dixital ás seareiras e seareiros celestes. Deste modo, de segundas a sextas feiras, a partir de hoxe e até a véspera do 23 de agosto, día no que a escuadra olívica alcanza os 100 anos de vida, nosdiario.gal publicará unha enquisa diferente na que dará a oportunidade de escoller os aspectos máis destacados da historia do Celta.
Quen foi mellor, Aspas ou Mostovoi? Que porteiro deixou máis pegada nos corazóns da parroquia de Balaídos? Cales dos técnicos que dirixiron o club até a actualidade continúan levantando simpatías? E, botando a vista cara aos despachos, que presidente elixirías? Rivadulla, Horacio Gómez, Carlos Mouriño...?
Taméb preguntaremos, ao fío da estrea dun novo escudo arroupado pola bandeira da Galiza con motivo do centenario, se a presente versión do escudo é a máis axeitada das que existiron desde os seus inicios, ou cal dos moitos himnos e cancións dedicadas ao Celta representa mellor o sentimento celtista.
Todo iso, e moito máis, poderá votarse no dixital de Nós Diario até o próximo día 23. Tamén ofreceremos toda a actualidade da data máis agardada polo celtismo cando encara a recta final. Quedan xusto 23 días para conmemorar o que aconteceu aquel 23 de agosto, precisamente, do ano 1923.
Comezamos a conta atrás esta terza feira, 1 de agosto, preguntando ao celtismo cal foi o mellor escudo da historia do equipo vigués, que tivo sempre presentes no centro os dous 'C' de 'Club Celta'. Podes opinar participando na nosa enquisa a través desta ligazón.
