Un día despois de dar a coñecer o novo himno, a Oliveira dos cen anos, o Real Club Celta vén de presentar na mañá deste sábado a primeira equipación coa que vestirán os seus xogadores na tempada do centenario. A principal novidade, que xa se anticipara na roupa de adestramento, é a presenza da bandeira galega acompañando no peito o escudo do equipo, xunto ao ano do seu nacemento, 1923, e o presente, 2023.
A cor celeste, cun ton moi intenso, predomina no deseño e obriga a difuminar as marcas publicitarias habituais. No costado esquerdo, unha lembranza da relevancia que terá esta campaña: a letra do novo himno gravada con relevo en letras tamén azuis.
Á dereita, un distintivo do ano do centenario co logo da entidade que se está a empregar nos diferentes actos para conmemorar a efeméride, os dous 'C' de 'Club Celta' que acompañou o escudo desde os seus inicios.
E non falta tampouco, precisamente, unha chiscadela a ese tempo pasado no que a fusión dos daquela dous equipos punteiros da cidade olívica, o Vigo Sporting Club e o Real Fortuna, deu paso ao Real Club Celta de Vigo. Os seus emblemas aparecen nas costas, á altura do pescozo.
👕💙
— RC Celta (@RCCelta) July 8, 2023
🎶 A Camiseta Dos Cen Anos 💯#OliveiraDosCenAnos pic.twitter.com/GUf32IwEoo
Os futbolistas que este ano ficarán ás ordes de Rafa Benítez estrearán a nova 'pel' o vindeiro 17 de xullo, segunda feira, nun encontro amigábel contra o Al Nassr saudita de Cristiano Ronaldo, no marco dun Torneo do Algarve que tamén enfrontará os celestes ao Benfica, o día 20.
E o domingo 29 será a quenda do Olympique de Lyon, que a partir das 20 horas visitará Balaídos para disputar un Memorial Quinocho ao máis alto nivel como paso previo ao inicio da Liga, o domingo 13 de agosto (17 horas), coa visita do Osasuna.