Pasadas as 12 horas, milleiros de paraugas encheron as rúas de Santiago de Compostela para reivindicar o galego e exixir a súa defensa e promoción ás Administracións, con motivo da manifestación polo Día das Letras Galegas.
Antes do comezo da manifestación, que daba comezo na Alameda, o portavoz da plataforma Queremos Galego! e presidente da Mesa pola Normalización Lingüística (AMNL), Marcos Maceira, en declaracións aos medios de comunicación, destacou os "éxitos" que conseguiu a "mobilización social" no último ano.
Baixo berros de 'Aínda que se molle, o galego non encolle', os manifestantes percorreron parte do Ensanche compostelán antes de introducirse no casco antigo da cidade, camiño da Praza da Quintana.
Xa na praza, puideron escoitarse proclamas contra o conselleiro de Educación, Román Rodríguez, pola suspensión do decreto do plurilingüismo.
O artista Xurxo Souto foi o encargado de animar aos milleiros de persoas que se acumlaban na Quintana, antes de proceder á lectura do manifesto. Un dos momentos máis singulares da concentración ocorreu cando Souto comezou a cantar ‘Non hai fronteiras’, canción das Tanxugueiras coa que intentaron concorrer ao Festival de Eurovisión.
Lectura do manifesto
Representantes do mundo da ensinanza e do audiovisual fixeron lectura do manifesto de Queremos Galego.
En concreto, a avogada e vicepresidenta da Mesa pola Normalización Lingüística, Elsa Quintas; a representante das ANPAS galegas, Esther Martínez; e as actrices e representantes do sector audiovisual galego Mónica García e Arantza Vilar, foron as encargadas da lectura do manifesto.
Insistiron en que "a tendencia negativa da lingua galega non é irreversíbel". "O compromiso e a acción da sociedade demostran diariamente que a situación pode mudar", subliñaron.
Intervención final de Marcos Maceira
O remate da manifestación correu a cargo de Marcos Maceira, cunha derradeira intervención na que lembrou a aprobación unánime da Iniciativa Xabarín, pola que se conseguiu o “compromiso de creación este ano da plataforma da TVG que contará coa canle infantil” e que “Netflix comezase a lexendar e dobrar algúns títulos” en galego.
Maceira reivindicou a “mobilización colectiva” dos galegos e galegas para conseguir ese “exito”, ao tempo que criticou que o Goberno español “pretende rebaixar a nosa demanda e limitala só a algunha das linguas oficiais. Apuntalar máis a hexemonía abafante do castelán”.
Tamén fixo referencia á "histórica sentenza" do Tribunal Superior de Xustiza da Galiza (TSXG), que "obriga a garantir o uso do galego diante de toda a administración, nomeadamente a do Estado".
Manifestación de Galicia Bilingüe
“No ano 2009, nesta mesma praza tiña lugar unha manifestación de odio ao galego ao grito de paletos e libertad”, lembrou o voceiro de Queremos Galego!, en referencia á manifestación que convocou o colectivo Galicia Bilingüe en 2009 no Obradoiro, e na que participaron, entre outros, o actual presidente da Xunta, Alfonso Rueda.
Maceira cualificou de “vergoñento” que “unha das persoas que encabezou esa manifestación de odio sexa hoxe presidente da Xunta, a mesma Xunta que nega as axudas ao uso do galego ao único xornal impreso en galego ou discrimina aos dixitais que empregan o noso idioma”.
“Non teñamos dúbida, se non fan máis estragos é porque todos e todas nós estamos día a día para llo impedir”, engadiu.
O presidente da Mesa insistiu en que o “novo futuro” do galego pasa polo pobo galego, que mantén a lingua porque non hai mellor elemento de unidade e de cohesión social”.
“Galegos e galegas, de todas as idades, xéneros, condicións e pensamento que queremos un futuro digno para a Galiza, que só existirá con toda a normalidade no uso da súa lingua. Queremos galego!”, concluiu Maceira.