cultura

Agustín Agra vén de facerse co XXVI Certame de Narración Curta Ánxel Fole coa obra O livro das contrarias. O xurado -composto pola poeta Mariña Pérez Rei, o escritor Fabio Rivas Pardo, e a escritora María Reimóndez- destacou que se trata dunha "obra de actualidade e ambiente cosmopolita que dialoga cunha ausencia, poñendo en dúbida os límites da memoria. A voz da narradora navega entre a linguaxe da fotografía, o xénero epistolar e a presenza icónica do mundo natural. Estes fíos tecidos constrúen unha obra de aparencia intimista, pero que revela puntos de conexión con temas tanto ambientais como de recuperación das voces e olladas das mulleres no ámbito científico a través dunha sensitiva voz narradora.

Xa se coñecen as regueifas premiadas na sétima edición do certame Enreguéifate, o proxecto impulsado polos concellos de Ames, Carballo, Pontevedra, Santiago de Compostela e Teo que apoia a difusión da improvisación oral en verso (regueifa) para contribuír por medio dela á promoción do uso da lingua galega. Na categoría xeral, os premios foron para: A máis brava, Arrieiro e Chaminho, con "Cumbia do choque"; A máis aguda, Escola de regueifa de Carballo, con "Vai de voda"; A máis diversa, Teiseiros regueifeiros, con "Regueifa pola saúde mental"; A máis reivindicativa, Iván e Aroa con "Regueifa de coidar a terriña"; A mellor cantada: Grupo Xuvenil da Terceira Idade de Poio, con "Sempre vida"; e A mellor falada, As da Muiñeira, con "Os deberes". 

As Residencias Artísticas Mariñán, promovidas pola área de Cultura da Deputación da Coruña, contan con 45 propostas: 24 de música e 21 de literatura e pensamento. O xurado de música está composto por Carles Sala (Fabra i Coats), Patricia Hermida (AGEM) e Carlos Crespo, xornalista musical; e o de literatura e pensamento pola poeta Yolanda Castaño, o escritor Iván García e a ensaísta María López, presididos pola deputada de Cultura, Natividade González.

A campaña de promoción das industrias culturais que se desenvolverá nos vindeiros meses ten a súa orixe nos sete microeventos culturais que xa se celebraron no mes de decembro, e que agora chegarán ao gran público a través das redes sociais.

A XV edición do Santiago(é)tapas, organizada por Turismo de Santiago, rematará este domingo tras conseguir converter a capital da Galiza "no epicentro da gastronomía en pequeno formato, grazas ás propostas culinarias que están a ter unha grande acollida entre o público, aos máis de 200 agasallos directos entregados a quen completa algunha das cinco '(é)tapas', e ás tres rutas especiais: Ruta Sen Glute, Ruta Doce e Ruta Vexetariana", segundo salientaron esta quinta feira desde a organización deste evento. Entre os máis de 200 agasallos para o público que completa as '(é)tapas', atópanse premios como abonos dobres para a tempada do Obradoiro CAB, así como a asistencia a diversas propostas culturais, turísticas e de saúde e benestar. Desta maneira, até este domingo, o público poderá seguir probando a gran cantidade de tapas que ofrecen os locais de hostalaría composteláns e votando as súas preferidas, ademais de selar o Tapasporte de cada local visitado, conseguindo os diversos agasallos directos na Oficina de Turismo da rúa do Vilar por cada '(é)tapa' finalizada.

O Museo de Pontevedra abre o programa expositivo deste 2024 coa mostra Castelao: o retorno a Galicia, 1984. Xan Carballa, fotografías. A exposición, que conmemora o 40º aniversario da chegada á Galiza dos restos mortais de Castelao, artéllase arredor da crónica fotográfica do 24 de xuño de 1984 realizada polo fotógrafo e xornalista Xan Carballa. As imaxes relaciónanse co canon imperante do novo fotoxornalismo que se implantou con aires de liberdade nos xornais e semanarios desde o fin da ditadura franquista. Incorpora tamén obra artística de Castelao, fotografías, documentación e prensa da época para contextualizar os anos do seu exilio. Castelao: o retorno a Galicia, 1984 estará patente desde o 7 de marzo, no Edificio Castelao, até o 2 de xuño.

 

O pianista reivindicou a preponderancia transformadora da música que vai máis aló do entretemento

A Real Academia Galega de Belas Artes realizará este sábado, 24 de febreiro, unha sesión extraordinaria pública para a recepción do académico numerario da sección de Música Alejo Amoedo, no auditorio Martín Códax do Conservatorio Superior de Música de Vigo, ás 13 horas. Pronunciará o seu discurso de ingreso, dedicado a Reveriano Soutullo, que contará con interpretación musical e será contestado en nome da institución polo académico Juan Durán.