O Parlamento Europeo está "a estudar todas as posibilidades" en torno ao uso de galego, catalán e euskera durante as sesións plenarias, indicou a presidenta da institución, Roberta Metsola, nunha entrevista con Europa Press.
Metsola confirmou que a petición, anunciada a finais de xullo polo Goberno español pero que non lle foi remitida até mediados de setembro, xa foi trasladada á Mesa do Parlamento Europeo, o órgano encargado de tomar a decisión. A dirixente comunitaria matizou que a cuestión segue pendente porque os servizos parlamentarios están a examinar "cales son as posibilidades".
Reivindicou que desde o ano 2006 "calquera cidadán español pode escribir ao Parlamento Europeo ou dirixirse a esta institución en calquera idioma oficial do Estado español" e, neses casos, a resposta cúrsase "no idioma escollido".
A presidenta do Parlamento Europeo explicou así que, aínda que a Eurocámara xa conta con procedementos claros para as comunicacións, no caso do uso de galego, catalán e euskera seguen a examinar "que facer".
Estaba previsto inicialmente que a Mesa tratase o asunto na súa reunión do pasado 3 de outubro, pero finalmente non se incluíu na axenda. A próxima reunión da Mesa terá lugar o 21 de novembro, ao comezo do próximo pleno en Estrasburgo, mais aínda non existe unha data exacta para abordar a cuestión.
Petición da Generalitat
A proposta española chegou despois de que a Generalitat de Catalunya presentase unha petición neste sentido na mesa de diálogo que os Gobernos catalán e español manteñen para abordar as relacións bilaterais.
Para que unha lingua poida ser utilizada durante o pleno da Eurocámara debe ser considerada oficial na UE. Un status que actualmente teñen concedido 24 idiomas, entre os que non se atopan galego, catalán e euskera. Un precedente similar é o do gaélico, que desde 2007 empezou a ser considerado lingua oficial e de traballo na Unión Europea, aínda que a adhesión de Irlanda tivese lugar en 1973.
O Goberno español xa pedira que estas linguas fosen recoñecidas como oficiais na UE en decembro de 2004, aínda que entón non chegou a solicitar o cambio necesario nos Tratados, polo que non adquiriron tal consideración.
