O presidente da Mesa pola Normalización Lingüística, Marcos Maceira, participou este sexta feira, xunto con Fito Rodríguez e María de Lluc Muñoz, no evento cultural Beyond Spain, que decorreu en Frankfurt como resposta a que o Estado español sexa o convidado de honra na Feira Internacional do Libro que está a ter lugar na mesma cidade.
Segundo explicou a Mesa, trátase dunha iniciativa internacional que ten por obxectivo “ofrecer un espazo para a creación cultural e literaria, para as linguas e os dereitos lingüísticos e para as ideas democráticas”.
Na súa intervención, Maceira sinalou que “a creatividade vibrante anunciada para a Feira do Libro ten un lado escuro”. “Mantén a consideración das linguas e das culturas galega, vasca e catalá como inferiores”, denunciou.
No caso galego, o presidente da Mesa lembrou o incumprimento sistemático da “escasa lexislación” que ampara o galego, desde o Estatuto até a Carta Europea da Linguas, por parte da Xunta e do Estado español, “a pesar das reclamacións da sociedade galega e mesmo do Comité de Ministros e Ministras do Consello de Europa”.
O galego, en retroceso
“O galego está presente en menos de 1% das sentenzas xudiciais, en menos de 1% dos seguros, en menos de 0,4% dos xoguetes”, lamentou Maceira.
Tamén asegurou que “non é posíbel facer trámites coa administración do Estado español (Facenda, Seguridade social ou SEPE, entre outras) e temos unha oferta audiovisual anecdótica”, ao que se lle engaden “as restricións ao noso idioma no ensino”.
“Con esta realidade”, finalizou Maceira, “non pode sorprender que o galego retroceda no seu uso. Sorprende, pola contra, que a pesar disto continúe a existir e que aínda existan moitas persoas dispostas a actuaren para repolo e normalizar o seu uso”.
