A comarca de Finisterre, e máis concretamente o Concello de Dumbría, foi a sede escollida como sede do Campionato Galego de Seleccións Comarcais de Fútbol 8 e Fútbol 11 das categorías de idade Sub-11, Sub-13 e Sub-14.
Este torneo de base desenvolverase nas instalacións deportivas do Conco e de San Paio de Refoxos coincidindo coas datas do Entroido, polo que comezará o 12 de febreiro, segunda feira, cos encontros femininos e concluirá un día despois, o 13, cos masculinos.
Segundo destacou a organización, que corre a cargo do Club de Fútbol Dumbría e da Real Federación Galega de Fútbol (RFGF), levan "traballando arreo" nun evento que congregará nenos e nenas das distintas delegacións nas que se distribúe o deporte rei na Galiza
Estas, en concreto, son: A Coruña, Lugo, Ferrol, Santiago, Ourense, Vigo e Pontevedra, así como da subdelegación da Costa.
Durante a presentación deste Campionato Galego de Seleccións Comarcais, o presidente do Dumbría, César Ferrío, puxo en valor o carácter "familiar" dunha proba que vai alén do eido estritamente deportivo, definíndoo como "unha xornada de celebración e convivencia" que, ademais, ofrecerá a oportunidade de ver en acción, por segunda vez, a selección feminina da Costa.
