O candidato á investidura como presidente da Xunta de Castela e León, Alfonso Fernández Mañueco, xustificou o acordo de goberno que impulsou coa formación de extrema dereita Vox como unha "mellora da calidade democrática" no Estado español. Fíxoo durante a primeira sesión do pleno de investidura que decorre nesta segunda feira, e no que sumará o único apoio dos ultradereitistas.
Mañueco, que contou desde o primeiro momento co apoio do presidente estatal do PP, Alberto Núñez Feixoo, para pactar con Vox, afirmou que era a "única alternativa" a unha nova cita electoral, e asegurou "catro anos de estabilidade" para Castela e León.
"Todos debemos felicitarnos polo resultado, é un acordo que respecta plenamente os principios que asumín ao comezar o proceso de negociación, é un acordo que reflicte a vontade amplamente maioritaria expresada polos casteláns e leoneses na última cita electoral e é un acordo que plasma a única alternativa viábel para evitar unha repetición electoral que ninguén quería", defendeu.
O actual presidente en funcións da autonomía presentou o programa de Goberno co que pretende impulsar a XI lexislatura da man da extrema dereita españolista.
Representación "moi renovada"
Mañueco destacou que os comicios do pasado 13 de febreiro tiveron como consecuencia unha representación "moi renovada". "É a máis plural da nosa historia autonómica, con representación de até oito formacións políticas distintas", sinalou.
Neste punto, Fernández Mañueco expresou o seu recoñecemento ao líder de Vox en Castela e León, Juan García-Gallardo, pola súa "vontade de diálogo".
"Somos dous partidos distintos, cada un coas súas lexítimas posicións, que os casteláns e leoneses coñecen sobradamente, pero soubemos dar exemplo de xenerosidade, responsabilidade e capacidade de acordo. Falando, negociando, e buscando puntos de encontro cando era preciso para alcanzar os consensos necesarios", resolveu.
Sobre este asunto, Fernández Mañueco apuntou que o pacto é "necesario" para mellorar o futuro de Castela e León, para pedir despois que o próximo Goberno de Castela e León sexa xulgado polos seus feitos e os seus resultados. pese a que Vox xa anunciou que cargará contra as leis de violencia de xénero e memoria histórica da autonomía.