“Hai 10 anos os ucraínos lanzaron a primeira contraofensiva á arbitrariedade, contra os intentos de privarnos dun futuro europeo e contra a escravitude”, afirmou hoxe o presidente ucraíno, Volodimir Zelenski, en alusión ao aniversario do comezo das protestas na praza de Independencia (Maidán) de Kíiv, que derivaron nun golpe de Estado da extrema dereita e no comezo da guerra de Ucraína en 2014.
Zelenski insistiu en que a entrada ucraína na Unión Europea (UE) era daquela un “soño romántico” e agora unha “realidade”. En paralelo, o presidente do Consello Europeo, Charles Michel, viaxou á capital ucraína entre mensaxes de apoio ás protestas difundidos pola líder da Comisión Europea, Ursula von der Leyen, ou a presidenta do Parlamento da UE, Roberta Metsola.
Un acordo para limitar o comercio con Rusia
O 21 de novembro de 2013, o daquela presidente ucraíno, Viktor Yanukovich, anunciou que rexeitaba asinar un acordo de asociación entre Ucraína e a UE, que implicaba limitar os vínculos comerciais con Rusia, e propuxo unirse a unha unión aduaneira con Moscova e outros Estados ex soviéticos.
No marco das protestas instigadas pola UE e os Estados Unidos -este último país chegou a participar na configuración do Executivo golpista-, a sublevación desatouse en febreiro de 2014 logo de que francotiradores da extrema dereita, que liderara as mobilizacións, comezaran a disparar contra policías e participantes nas protestas, como confirmou unha sentenza emitida en outubro por un tribunal ucraíno.
Desinformación
A pesar disto, desde o primeiro momento até a actualidade, tanto a extrema dereita como os medios occidentais sosteñen que Yanukovich ordenou atacar os manifestantes.
![Sira Rego é ministra con Sumar. [Imaxe: Alberto Ortega / Europa Press]](/asset/zoomcrop,480,270,center,center/media/nosdiario/images/2024/05/01/2024050122045973661.jpg)
