A división dos Estados da UE impide o embargo do petróleo ruso

Hungría, Eslovaquia e outros Estados, sinalan fontes diplomáticas, piden un trato diferenciado. Fontes da OPEP indican que os países exportadores non farán máis esforzos para axudar Occidente.
Fontes da OPEP sinalaron que non incrementarán a oferta de petróleo. (Foto: Mohssen Assanimoghaddam / dpa)
photo_camera Fontes da OPEP sinalaron que non incrementarán a oferta de petróleo. (Foto: Mohssen Assanimoghaddam / dpa)

Os Estados da Unión Europea (UE) seguirán negociando durante a semana para tentar lograr a unanimidade necesaria para prohibir todas as importacións de petróleo ruso ao seu territorio.

A proposta detallada pola presidenta da Comisión da UE, Ursula von der Leyen, sobre o sexto paquete de sancións, foi examinada polos Estados membros ao longo desta semana. O obxectivo de von der Leyen era lograr un acordo antes desta fin da semana.

O paquete de sancións prevé un embargo a todas as importacións de petróleo ruso á UE por calquera vía, cun período de transición de seis meses no caso do cru e de oito para os produtos refinados.

Porén, a excepción prevista para que Hungría e Eslovaquia puidesen atrasar un ano a súa aplicación complicou as negociacións porque o prazo resultaba insuficiente a ollos destes países, e queren atrasalo até 2024. Outros Estados membros pediron ese trato diferenciado, algo que a República Checa logrou xa consolidar no texto para si.

O encontro concluíu sen acordo tras unha hora e media de debate no que quedou constancia de que Hungría reclama "máis garantías" sobre as alternativas de subministración ou compensacións por romper co fluxo ruso, indicaron diversas fontes diplomáticas.

Os contactos "a todos os niveis continuarán a principio de semana" co obxectivo de alcanzar "canto antes" un acordo, engaden outras fontes europeas, que insisten en que as cuestións pendentes non son tanto "políticas" como "técnicas".

A OPEP non rescatará a UE

A Organización de Países Exportadores de Petróleo (OPEP) non ten intención de aumentar a produción para frear a suba dos prezos da enerxía, no medio das sancións de Occidente contra Rusia, segundo reportou este sábado o diario británico The Daily Telegraph, citando fontes do sector.

Nas circunstancias excepcionais que hai detrás da actual escalada de prezos atópanse o inesperado e forte reponte da demanda tras a pandemia e o desenvolvemento da operación militar rusa en Ucraína, segundo o medio. Isto xerou que a OPEP, a pesar das repetidas peticións dos Estados Unidos de América, non queira prexudicarse economicamente aumentando a produción, xa que isto reduciría o prezo.

Non hai practicamente ningunha posibilidade de que a OPEP faga máis para axudar a Occidente a contrarrestar a Rusia, indicou o medio citando ás súas fontes. En cambio, mantense á marxe, esperando a ver onde caen as fichas, agregou.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios