A compravenda de vivendas volveu caer en maio (-10,7%) en comparación co mesmo mes de 2022, cun total de 1.644 transaccións, segundo os datos publicados polo Instituto Nacional de Estatística (INE) esta sexta feira.
Deste modo, a compravenda de vivendas acumula medio ano de caída consecutiva na Galiza, xa que o último dato positivo interanual produciuse en novembro de 2022 -en negativo decembro de 2022 e todo 2023-. No Estado encadéanse catro meses de taxas negativas.
O retroceso de maio na Galiza é catro puntos máis acusado que o 6,4% de baixada na media estatal e supón a sexta maior diminución entre territorios.
A maior caída compútaa A Rioxa (-37%). No outro extremo, Cantabria lidera o repunte (+21,1%).
A taxa de compravenda de vivendas na galiza é 75 por cada 100.000 habitantes, polo que continúa como a máis baixa do país.
Do total de maio, a compravenda foi de 1.598 vivendas libres e 46 protexidas. Ademais, foron 1.304 usadas e 340 novas.
Subida en leiras
Pola súa parte, o total de leiras transmitidas alcanzou as 9.835 na Galiza, un 1% máis que o quinto mes de 2022. Contrasta coa diminución de 5,4% na media estatal.
Estas 9.835 leiras divídense en 6.379 urbanas -3.426 vivendas, 279 solares e 2.674 doutro tipo- e 3.456 rústicas.
As 3.426 vivendas transmitíronse a través das citadas 1.644 compravendas, 870 herdanzas, 24 doazóns, tres permutas e 885 doutro tipo.