O horizonte da liña Lisboa-Vigo afástase até 2040

A comunicación por alta velocidade ferroviaria entre Porto e Vigo quedará relegada a 2040. Esta cuarta feira o Pleno do Parlamento Europeo deu o seu visto e prace definitivo á revisión da Rede transeuropea de transporte (RTE-T), formalizando as prioridades en materia de infraestruturas a financiar a cargo dos fondos comunitarios no horizonte de 2030. O documento aprobado resultou coincidir, basicamente, co que se acordou o pasado mes de decembro de 2023 durante a Presidencia española do Consello da Unión Europea. Nel dáse prioridade á liña Lisboa-Madrid, quedando a conexión coa Galiza baixo unha nova categoría denominada rede básica ampliada. Ignorar o eixo atlántico Para a investigadora do Departamento de Xeografía da Universidade de Santiago (USC), Inês Gusman, a noticia de que “outra vez podemos asistir á recuada da ligazón ferroviaria de alta velocidade entre Vigo e Porto polos deputados e deputadas do parlamento europeo é sorprendente”. En declaracións a Nós Diario, considera que o feito de darlle toda a prioridade de financiamento á liña que comunique Lisboa con Madrid “ignora o que xa se fixo do eixo atlántico que liga as cidades de Lisboa, Porto, Vigo, Santiago de Compostela e A Coruña”, uns espazos que, entende, “son dos máis dinámicos que existen na península Ibérica”. Portugal pon 2025 como data de inicio dos traballos da alta velocidade Esta investigadora portuguesa indica que a decisión que toma agora o Parlamento europeo “ignora que é pola fronteira do rio Miño por onde pasa a gran parte dos fluxos ferroviarios entre Portugal e o Estado Español”, ademais, de non ter en conta que “hai milleiros de traballadores, estudantes e empresarios que diariamente se move entre a Galiza e o norte de Portugal”. Gusman resume a súa avaliación sinalando que “a opción política de non financiar a liña de alta velocidade entre Porto e Vigo é unha moi mala noticia e un retroceso para as persoas, para a economía e para o ambiente da Galiza e tamén do norte de Portugal”. A nova liña básica O plan aprobado coloca a liña que comunica a Galiza con Portugal nunha nova rede básica, denominada "ampliada", transeuropea. Entre as súas características figuran que os trens estean electrificados, teñan unha velocidade mínima de 160 quilómetros á hora para os trens de pasaxeiras e pasaxeiros -a partir de finais de 2040-, circulen a 100 quilómetros á hora no caso do transporte de mercadorías e atravesen as fronteiras interiores da UE a finais de 2030 en menos de 25 minutos de media. O plan contou coa aprobación de 566 votos favorábeis, entre eles os do PSOE, e os votos en contra de BNG, PP, Unidas Podemos e Vox. En opinión da eurodeputada do BNG, Ana Miranda, esta decisión supón "unha discriminación para Galiza e un grave revés para a posta en marcha desta conexión ferroviaria fundamental e irrenunciábel para Vigo e para o conxunto da Galiza”. A eurodeputada nacionalista, que votou en contra, critica “a complicidade escandalosa dos distintos gobernos do PP e do PSOE na discriminación de Galiza, e da área de Vigo en concreto, para incluíla na rede transeuropea de transporte é escandalosa”. O Goberno luso urxe España a impulsar o AVE Galiza-Lisboa Entre os apoios que recibiu o documento estiveron os do PSOE. O europarlamentario socialista galego, Nicolás González Casares, considera, en declaracións a Nós Diario, que a votación deste regulamento "remite a un acordo anterior que agora se ratifica", polo que "leva tempo, non é unha novidade". En relación á Galiza, indica que "a liña Vigo-Porto está no corredor atlántico na rede básica extendida". A creación desta nova categoría non implicaría atrasos, segundo González, senón "un novo límite que chegaría até os 2040, polo que podería chegar antes se hai vontades polas partes interesadas". Desde o PP as queixas viñeron, sobre todo, despois de que non figuraran no acordo final a maior parte das emendas que introduciron no seu momento. Por este motivo, para o eurodeputado do PP, Francisco Millán Mon, a Presidencia española do Consello desaproveitou a súa oportunidade. En declaracións a Nós Diario asegura que "o Parlamento europeo fixo o seu traballo. A posición inicial do Parlamento contaba cunhas propostas beneficiosas para o Estado español e para a Galiza en especial". Porén, lamenta que nas negociacións dos denominados "trílogos" (os grupos informais que se forman no Parlamento europeo para cada unha das propostas lexislativas) moitas das posicións "non tivesen o respaldo do Consello". Esta "oportunidade perdida", segundo Millán Mon, estaría centrada na idea de que a Galiza " pola súa propia situación xeográfica e o dinamismo da súa economía e dos seus cidadáns, require estar dotada das mellores infraestruturas de transporte e conexións co resto do Estado e Europa, incluído, obviamente, Portugal".