O prezo medio da vivenda na Galiza situouse en 1.141 euros por metro cadrado no segundo trimestre de 2023, o que supón 4,3% máis que no mesmo período de 2022, segundo un estudo da compañía Gesvalt.
Esta cifra está por baixo dos 1.568 euros por metro cadrado rexistrado no Estado español no segundo trimestre. No segundo trimestre do ano, mantívose o crecemento territorial desigual no prezo da vivenda.
A pesar diso, seis comunidades autónomas experimentaron crecementos superiores ao 7%, liderados polo País Valencià (8,2%).
Pontevedra rexistra o maior incremento na Galiza, con 4,4% e un prezo de 1.317 euros por m2etro cadrado, seguida da Coruña (2,6% e 1.185 euros/m2), Lugo (2,2% e 890 euros/m2) e Ourense (1,7% e 1.006 euros/m2).
En referencia ao aluguer, Galiza rexistrou un incremento interanual de prezos de 5,9% até situarse en 7,33 euros por metro cadrado ao mes. O territorio galego que viviu o maior incremento foi A Coruña (5,8%), seguida de Pontevedra (5,2%), Lugo (4,5%) e Ourense (3,4%).
Rendibilidade bruta
Por outra parte, Idealista informa de que a rendibilidade bruta da compra dunha vivenda para colocala no mercado do aluguer diminuíu lixeiramente durante o segundo trimestre, até o 7,1%, xa que no mesmo período de 2022 o retorno que ofrecía situábase no 7,2%.
Segundo o estudo realizado, a rendibilidade obtida duplica, no peor dos casos, as taxas que ofrecen os Bonos do Estado a 10 anos (3,3%). A Coruña e Pontevedra están entre os territorios con menor rendibilidade no Estado.
