Como comezar con bo pé as comidas do Nadal?

O Nadal está á volta da esquina e virá cheo de xantares e ceas con amizades e familia. Se non queredes repetir os mesmos entrantes de cada ano ou estades cansas e cansos dos canapés de paté e falso caviar velaquí vén unha batería de propostas para sorprender as e os vosos convidados. 'Antipasti' Comezamos cun antipasti galego. Antipasti é unha palabra italiana que significa aquelo que ven antes da comida, pasto. Adoita empregarse para referirse a un tipo específico de entrante ou aperitivo. Nun bo antipasti italiano non poden faltar embutidos, queixo ou verduras, tanto asadas como encurtidas. E todo isto acompañado con pan e viño. Como no noso país tamén producimos queixos e embutidos excelentes imos facer unha versión á galega deste entremés. Para os queixos empregamos queixo de San Simón, queixo de Arzúa, queixo azul, queixo de ovella con romeu e tomiño e tamén Idiazabal, un queixo de ovella moi famoso feito en Euskadi. Cortamos os queixos en cuñas ou taquiños, como máis gostemos, e colocámolos sobre unha bandexa xunto a xamón, salchichón e lacón cocido. O lacón cortámolo en lascas e botámoslle un chisco de aceite e pemento picante moído por enriba. Para acompañar os embutidos e o queixo, podemos engadir noces, uvas e encurtidos como olivas, cogombriños ou ceboliñas. Xa o temos case todo listo, fáltanos só o último complemento, as verduras. Para comer enriba do pan fican xeniais uns tomatiños cereixa asados, facémolos na tixola con allo e aceite e despois aderezámolos cunhas folliñas de alfábega por enriba. Outra boa idea é unha escalivada, un prato típico de Catalunya que contén pementos, berenxena e cebola asados. Así, dun modo sinxelo e rápido conseguimos un aperitivo moi vistoso e completo, perfecto para petiscar antes dunha comida mentres tomamos un viño e botamos unha parolada. Follados As masas folladas son moi versátiles e un recurso económico e sinxelo co que facer millóns de receitas, tanto doces como salgadas. Tráiovos dúas suxestións para empregalas. A primeira é unha empanadiña de grelos, queixo de Arzúa e noces. É vexetariana, rápida e moi saborosa, ademais tanto podemos facela ao momento e comela temperada como deixala preparada con antelación, estará igual de boa. A outra é un volován de lagostinos, limón e cava. Volován provén do francés vol-au-vent, que traducido literalmente sería algo así como voar ao vento ou saír voando, e como podedes imaxinar chámanse así porque son moi lixeiros. Este prato de orixe francés, consiste nun pastel oco de masa de follado e que se pode reencher para facer pratos doces ou salgados. O recheo neste caso está feito con lagostinos cocidos bañados nunha crema de cava e limón. A crema que acompaña os lagostinos ten un toque especial grazas ao limón e ao cava e fai que o pasteliño sexa unha delicia! Produtos do mar No Nadal os peixes e os mariscos adoitan ser os alimentos máis demandados e na Galiza contamos cunha gran calidade e variedade destes produtos. Seguen algunhas opcións con froitos de mar para cociñar estas datas. Comezamos cunha receita moi sinxela, chips de pataca doce para mollar nun guacamole de lagostinos. A batata facémola ao forno cortada en toros non moi grosos con sal e aceite até que quede crocante e dura. Mentres, facemos o guacamole con aguacate, ceboliña e tomate. Cando o teñamos listo engadímoslle os lagostinos cocidos cortados en anacos. Os lagostinos combinan á perfección co guacamole e os chips son estupendos para mollar nel, ademais de encher de cor o prato grazas ao rechamante laranxa da batata. As seguintes propostas están a cabalo entre os entrantes e o primeiro prato, poderían servirnos nos dous casos. En primeiro lugar temos unha receita moi sinxela para cociñar as zamburiñas, un marisco que goza de gran popularidade grazas a súa relación de calidade e prezo. Só precisamos aceite e allo e pirixel picados. Facemos un mollo con estes ingredientes e botámosllo por enriba ás zamburiñas mentres se cociñan ao forno, en 10 minutos teremos un prato exquisito. As croquetas de centola non son nin tan rápidas nin tan económicas como as zamburiñas mais o resultado é espectacular. Son traballosas principalmente porque precisamos cocer a centola e tirar toda a súa carne, pero merecen a pena grazas ao seu incríbel sabor. Unha vez teñamos toda a carne desfiada incorporámola á bechamel e deixámola repousar, o ideal é facelas dun día para outro para que sexa máis sinxelo darlles forma e fritilas. A última preparación que vos suxiro é con outro dos manxares das nosas rías. Trátase dunha crema de mexillóns con curry, unha sopa moi saborosa grazas á combinación das especias cos mexillóns. Empregamos a auga de abrir os mexillóns para cocer algunhas verduriñas como porro ou cenoria, engadímoslle curry, cúrcuma e os mexillóns sen cuncha e finalmente trituramos todo. Se é para comer como entrante, servida en copiños de chopo quedará moi orixinal. Estas son só algunhas ideas para que gocedes petiscando antes das vosas ceas ou xantares nas próximas festas, agardo que cociñedes todo e desfrutedes destas delicias. Bo Nadal! * Receitas completas en fogonsdetonaanxo.gal