Entre o Entroido e a Coresma

—Hummus O hummus é un prato tradicional de Oriente Medio. É coñecido pola sua textura cremosa e o seu sabor suave. Elaboración: Comezamos espremendo o limón e botámolo cos garavanzos e co resto dos ingredientes no vaso do batedor, engadímoslle un chorriño de auga e batemos até que quede unha mestura homoxénea. No caso de que quede moi espeso engadimos outro pouco de auga e batemos de novo. Servimos con pementón e cun chorriño de aceite por riba. Podemos acompañalo con pan ou verduras crúas como a cenoria cortada en tiras. —Coliflor gratinada con curry e queixo A coliflor gratinada é unha festa de aromas e sabores, ten unha textura cremosa e a mestura de especias danlle un toque exótico que deleita todos os sentidos. Elaboración: En primeiro lugar cocemos a coliflor nunha pota con auga fervendo durante uns 10 minutos máis ou menos e retirámola do lume, escorrémola e deixamos que arrefríe un pouco. Mentres tanto picamos a cebola ben finiña e nunha pota cun chorriño de aceite sofritímola a lume baixo até que se pase. Engadimos o comiño, o curry, a mostaza e o chile, cortado en anacos pequenos e sen sementes. Remexemos todo e deixamos ao lume uns minutos. Engadimos a nata, 100 g do queixo e un chisco de sal. Deixamos cociñar a fogo lento uns minutos até que espese un pouco. Nunha bandexa apta para o forno colocamos un chisco de salsa no fondo, poñemos a coliflor en ramas por enriba e cubrímola co resto do mollo. Mesturamos nun cunco á parte o pirixel picado fino, coas faragullas do pan e o restante do queixo e botámolo por enriba da coliflor. Limpamos os bordes da bandexa con un pano de papel e metémolo no forno, que previamente quentamos a 180º C, durante uns 8 minutos até que comece a burbullar o mollo. Neste momento acendemos o grill e gratinamos á máxima temperatura até que se doure a coliflor, con ollo de non queimala. Retiramos do forno e servimos cando arrefríe un pouco. —Bica de Laza A Bica de Laza é un doce tradicional galego, típico do Entroido da vila de Laza en Ourense. É un biscoito denso e esponxoso, caracterízase pola sua cor branca polo que tamén é chamado bica de nata. Elaboración: Imos comezar preparando a nata, montámola cun batedor de globo até que debuxe sucos e reservamos. A continuación separamos as claras das xemas e montámolas cun batedor, comezando a baixa potencia e subindo até que vexamos que duplican o seu tamaño. Engadímoslles 400 g de azucre pouco a pouco e mentres continuamos batendo para obter un merengue. Despois peneiramos a fariña e imos botándolla ás claras pouco a pouco e remexendo cunha lingua pasteleira con movementos suaves e envolventes para evitar que se desmonten as claras. Incorporamos a nata e seguimos mesturando até ter unha mestura homoxénea. Vertemos no molde e botámoslle azucre por enriba ao gusto coa axuda dun coador. Para cociñala imos metela no forno que previamente quentamos a 190º. Deixamos uns 55 minutos máis ou menos, con calor arriba e abaixo e imos vixiando que non se nos queime por arriba. Podemos picar cun pau e se sae seco xa estará cocida, se non deixamos un anaco máis. Unha vez lista, apagamos o forno e deixámola dentro coa porta aberta até que arrefríe de todo.