Adozando a cimeira de Xaneiro

—Tartar de aguacate e manga: un entrante vexetariano, moi fresco e sinxelo, perfecto para abrir o apetito. Elaboración: Comezamos cortando e lavando o tomate en taquiños pequenos. Cortamos do mesmo modo a cebola. A continuación tiramos a monda do aguacate e a manga e cortámolos en tacos do mesmo tamaño e esprememos o limón por enriba do aguacate para evitar que se oxide. Para elaborar a vinegreta coa que imos regar o tartar mesturamos unha cullerada de vinagre de módena, tres de aceite e unha de mel. Engadimos tamén un chisco de sal e pementa ao gusto e remexemos todo até ter unha mestura homoxénea. Para montar o prato imos axudarnos dun aro para empratar, imos colocando as verduras por capas e retiramos o aro. Finalmente botamos un par de culleradas de vinagreta por enriba e servimos. —Curry vexetal de cabaza: un prato delicioso que combina os sabores suaves e doces da cabaza coas especias aromáticas do curry. Elaboración: En primeiro lugar pelamos os allos e o xenxibre e botámolo nun morteiro, machucámolos cun chisco de auga e reservamos. A continuación cortamos a cebola en xuliana e pochámola cun pouco de aceite a lume baixo, deixámola 5 minutos e engadimos o xenxibre e o allo. Incorporamos tamén as follas de loureiro enteiras e seguimos cociñando a fogo baixo. Cando estea case lista engadimos o tomate cortado en anaquiños moi pequenos e deixamos outros 10 minutos. Finalmente retiramos as follas de loureiro e engadimos o medio iogur e as especias: o comiño, o pementón e a cúrcuma. Cociñámolo todo xunto uns minutos e triturámolo cun batedor engadíndolle un pouco de auga. Reservamos a mestura e comezamos coa cabaza. Imos pelala e cortala en dados pequenos e nunha tixola cun chisco de aceite salteala. A continuación botámoslle a mestura coas especias, o leite de coco e deixamos cocer a fogo baixo até que estea ao punto, uns 15 minutos será suficiente. Un pouco antes de que a cabaza estea pronta engadimos os garavanzos cocidos e mesturamos. Servimos nun cunco e decoramos con unhas folliñas de cilantro fresco. —Goxua: unha lambonada moi famosa en Euskadi. Goxua en euskera significa doce ou que está bo. Esta lambetada faise en tres capas: unha base de nata montada, unha capa de biscoito borracho en almibre e unha última de crema acaramelada. É unha auténtica bomba pero como o seu propio nome indica está delicioso. Elaboración: Imos comezar preparando a nata, para isto botámoslle 15 g de azucre e cun batedor de globo montámola até que debuxe sucos e reservamos. Para facer a crema imos infusionar o leite. Para isto reservamos un pouco de leite nun vaso e quentamos o resto nun cazo, coa monda do limón e a canela. Cando comece a ferver retiramos do lume e deixamos infusionar 10 minutos, pasado este tempo retiramos a canela e a monda do limón. Engadimos ao leite frío pouco a pouco a fariña de millo e remexemos para que se disolva, cando estea toda botamos 30 g de azucre e o ovo. Mesturamos todo ben e a continuación engadímolo ao cazo co leite quente, poñémolo a lume medio e remexemos cun batedor de globo para evitar que se pegue até que espese. Sacamos do lume e deixamos arrefriar. Para emborrachar as madalenas precisamos un almibre, para isto mesturamos 15 g de azucre con 45 ml de auga e quentamos até que se disolva o azucre. A continuación retirámolo do lume e incorporamos o ron, mesturamos ben e agardamos a que arrefríe un pouco. Cando estea atemperado colocámolo nun prato e emborrachamos as madalenas nel. Finalmente para montar o goxua imos empregar dous vasos. Colocamos primeiro unha capa de nata, a continuación a madalena borracha e por último a crema. Botamos unha culler pequena de azucre por enriba da crema e cun soprete acaramelámolo. Servimos ben frío e acompañámolo cunhas follas de menta para decorar.