Velaí vén a primavera!

—Ensalada temperada de feixóns verdes Esta ensalada é fresca e chea de enerxía, ten moito sabor e ademais é moi sinxela de preparar. Elaboración: Comezamos lavando e tirando os fíos dos feixóns verdes e cocémolos en auga con un chisco de sal durante uns 15 minutos, máis ou menos. Cocemos tamén os ovos durante 10 minutos. Unha vez listos pasamos os feixóns por auga fría para evitar que sigan cociñándose e reservamos. A continuación pelamos os ovos e cortámolos en cuartos, cortamos tamén a cebola á xuliana. Mesturamos nun bol os feixóns coa cebola e colocamos por enriba o ovo e as sardiñas. Regamos cun chorriño de aceite e botámoslles pementa negra por enriba. Servimos temperada. —Polo piri-piri O polo piri-piri é unha receita con orixe africana moi famosa na gastronomía portuguesa. O mollo é ideal para asar o polo enteiro á grella pero podemos facelo igual de bo na casa. Elaboración: Para facer esta receita necesitamos preparar con antelación o mollo para deixar macerando nel o polo; podemos preparalo dun día para outro para que colla todo o sabor. Para elaborar o piri-piri cortamos o pemento vermello e os chiles tirándolle as sementes. Botámolos no vaso dun batedor eléctrico e engadimos o zume do limón e o resto de ingredientes. Agregamos un chisco de sal e regamos cun chorro abundante de aceite. A continuación batemos todo ben até que fique homoxéneo e sen gromos. Vertemos o mollo nun recipiente con tapa, incorporamos as peitugas e deixamos na neveira idealmente dun día para o outro; se non temos tempo un par de horas podería ser suficiente. Nesta receita utilizamos peitugas de polo pero podemos facelo con zancos, aliñas ou mesmo o polo enteiro. Despois de maceralo para darlle todo o sabor podemos cociñalo. Para isto nunha tixola ben quente, botamos un chorriño de aceite e selamos as peitugas por todos os lados para evitar que se sequen. Posteriormente, baixamos o lume e cubrímolas cun pouco do mollo piri-piri, tapamos a tixola e deixamos cociñar virándoas de vez en cando para que non se queimen. Cando teñamos o polo ao punto, retiramos da tixola e facémoslle uns cortes. Servimos as peitugas con mollo por enriba e acompañadas con patacas fritidas ou arroz e un pouco de ensalada. —Crumble de amorodos Nesta receita mesturamos a frescura dos amorodos coa cobertura crocante creando unha delicia coa que gozar a cada bocado. Elaboración: Imos comezar lavando os amorodos, sacándolles a cabeza e cortándoos pola metade. Colocámolos nun recipiente apto para o forno, botámoslles por enriba dúas culleradas de azucre e deixamos macerar un pouco. Noutro cunco á parte mesturamos coas mans a manteiga cortada en cubos coa fariña e o resto do azucre até obter unha especie de area. Botámolo por enriba dos amorodos e metemos no forno, que previamente quentamos a 200 ºC. Deixamos uns 15 minutos, máis ou menos, o suficiente para cociñar as fresas e que se douren as faragullas por enriba. Retiramos do forno e servimos morno, aínda que tamén o podemos saborear frío.