As últimas 'paparotas' do verán

—Pementos do piquillo recheos Os pementos do piquillo podemos comelos sós ou recheos, sempre están deliciosos. Esta vez imos probalos con gambas e bacallau. Elaboración: En primeiro lugar imos preparar o recheo. Comezamos cocendo o bacallau até que estea ben cociñado, dependerá do tamaño dos lombos pero arredor duns 10 ou 15 minutos. Pasado este tempo sacámolo e gardamos a auga de cocción. Nunha tixola cun chisco de aceite botamos a cebola e o allo moi picadiños e refogámolos a fogo baixo cun pouco de sal. Cando teñamos a cebola ben pasada engadimos o bacallau desfiado sen pel nen espiñas. Engadimos tamén as gambas e pasado un anaco botamos unha culler de fariña para que se cociñe mentres mesturamos. Botamos un chorriño de leite e remexemos constantemente até que espese. Retiramos do lume e deixamos arrefriar. Por outro lado preparamos o mollo, para isto botamos noutra tixola 3 ou 4 pementos cun chisco de aceite e un allo picadiño. Cando teñamos o allo pasado engadimos unha culler de fariña, deixamos até que se faga ben e botamos o chorriño de viño e un pouco do caldo no que cocemos o bacallau. Cociñamos uns minutos, trituramos ben cun batedor e voltamos a cociñalo na tixola outro anaco. Finalmente, para rematar, enchemos os pementos coa mestura de bacallau e gambas coa axuda dunha culler de café. Colocámolos na tixola co mollo para que se acaben de cociñar uns minutos e servimos os pementos xunto co mollo. —Fideua de polo e feixóns verdes Podemos pensar na fideua como a versión rápida da paella pero non ten nada que envexarlle. Elaboración: En primeiro lugar cortamos a cebola, os pementos e o allo en brunoise. Nunha paella ou tixola baixa cun pouco de aceite douramos primeiro o polo e a continuación os feixóns e reservamos todo. Para preparar o sofrito engadimos o allo e a cebola á tixola e refogamos a lume baixo cun chisco de sal até que a cebola estea case pasada, momento no que incorporamos os pementos e deixamos cociñar outros 10 minutos. Pasado este tempo botamos o tomate pelado e cortado en cadrados e cociñamos ben. Botamos tamén unha culler pequena de pementón e remexemos para que se cociñe. A continuación incorporamos os fideos para que se douren uns minutos, colocamos os anacos de polo e os feixóns e regamos co caldo. Botámoslle tamén o azafrán, mesturamos todo e cociñamos a fogo forte uns 7 ou 9 minutos dependendo do tipo de fideos e de como nos gusten. Deixamos repousar un pouco antes de servir. —Pexegos asados con area de bolachas e xeado de vainilla Os pexegos están no seu mellor momento e aquí vos traio unha forma sinxela e diferente para gozar deles. Elaboración: A preparación desta sobremesa é ben sinxela pero non por iso menos saborosa. Comezamos lavando e partindo á metade os pexegos, retirámoslles a carabuña e colocámolos nunha fonte apta para o forno co corte cara a arriba. A continuación, metémolos no forno a 180º durante 15 ou 20 minutos, dependendo do seu tamaño. Cando os teñamos cociñados retiramos do forno e esmagamos as bolachas coa axuda dun morteiro ou meténdoas nunha bolsa de conxelar. Servimos os pexegos nun prato cunha camiña de area de bolacha por baixo e acompañados dunha bola de xeado de vainilla.