Cabazas antes do Samaín

—Saquiños de porros asados Esta receita é un modo moi orixinal e saboroso de gozar dos porros. Podemos facer os saquiños co recheo que máis nos guste. Elaboración: En primeiro lugar imos preparar os porros. Lavámolos e facemos un corte lonxitudinal polo medio para separar todas as capas como follas. A continuación preparamos o recheo, para isto mesturamos nun cunco a carne, o arroz, o tomate cortado en dadiños, o aceite, un chorriño de limón e as especias ao gusto. Engadimos tamén pirixel e menta fresca picados e remexemos para integrar todos os ingredientes. Para montar os saquiños colocamos unha culler de sobremesa do recheo nunha folla de porro e imos dobrando en forma de triángulos ao longo do porro até arriba. Repetimos o proceso até rematar o recheo e colocámolos nunha bandexa apta para o forno. Para asalos imos facer un mollo antes, para isto mesturamos o mel co zume de medio limón, 20 ml de aceite e 100 ml de auga. Botámolo sobre os porros e tapámolos primeiro con papel de forno e a continuación con papel de aluminio. Cociñamos no forno a 180º durante 75 minutos. Pasado este tempo comprobamos se se evaporou todo o caldo, de ser así engadimos un vaso de auga, e deixamos outros 15 minutos no forno sen cubrir. Servimos quentiños. —Bacallau confeitado con puré de cabaza Neste prato xogamos co contraste de sabores e texturas. O doce da cabaza combina a perfección co sabor máis salgado do bacallau. Elaboración: Comezamos pelando a cabaza e tirándolle as sementes, cortámola en anacos e reservamos. Lavamos tamén o porro e cortámolo en toros. Nunha pota cun chisco de aceite rustrimos o porro e a cabaza uns minutos, logo cubrímolos con auga e un chisco de sal e cocemos uns 25 minutos. Pasado este tempo comprobamos que están brandiños, escorrémolos e triturámolos cun batedor para facer o puré. Despois de triturar as verduriñas, botámoslle sal, pementa negra moída e un chorriño de leite para darlle unha textura máis suave, remexemos ben e reservamos. A continuación imos preparar o bacallau, comezamos limpándoo e secándoo ben cun pano de papel. Para confeitalo, botamos nunha pota non moi grande o suficiente aceite para cubrilo e pómolo a fogo medio, cando comece a burbullar o aceite engadimos os dous lombos xunto cos allos enteiros pelados e as caienas. Deixámolo confeitar uns 20 minutos co lume ao mínimo, pasado este tempo retiramos do aceite e escorrémolo ben. Por último para montar o prato facemos unha camiña de puré e colocamos o lombo de bacallau por enriba. Podemos decorar con lascas de allo fritidas e as caienas. —Farófias á moda de Nuno As farófias son un doce moi famoso en Portugal, principalmente na área de Lisboa. Son moi suaves, esponxosas e moi sinxelas de preparar. Elaboración: Para comezar a preparación cascamos os ovos e separamos as xemas das claras. Nun cunco engadimos o azucre branco, as claras e a reladura da pel de laranxa. Batemos cun batedor de globo, comezando a baixa potencia e subindo até que se monten e debuxen sucos. A continuación, coa axuda dunha culler imos facer montañiñas coas claras montadas e colocámolas sobre un prato. Cando teñamos 4 metémolas no microondas a 400 W durante un minuto. É importante respectar o tempo para que queden ben esponxosas e non se nos pasen. Repetimos o proceso até telas todas cociñadas e deixámolas arrefriar. Para preparar a cobertura, botamos nun cazo o azucre cun chorriño de auga e facemos a fogo baixo até termos un caramelo moi líquido. Cando o teñamos, retiramos do lume e deixamos arrefriar un chisco para non cocer as xemas cando as incorporemos. Posteriormente engadimos as xemas fóra do lume e mesturamos cun batedor de globo até que se integren completamente. Por último, voltamos a colocar o cazo a fogo moi baixo e cociñamos un par de minutos mentres remexemos constantemente. Servimos as farófias ben frías co mollo que preparamos por enriba.