Xantar de Nadal

—Pasteliños de zamburiñas e porros Estes pasteliños son un xeito diferente de gozar do sabor das zamburiñas. Elaboración: En primeiro cortamos círculos de masa follada duns 15 cm de diámetro e colocámolos nos moldes. Colocamos os garavanzos por enriba da masa follada con papel de forno por abaixo para evitar que suba a masa mentres a cociñamos. Metémolos no forno, que previamente quentamos a 180 graos, durante 10 minutos. Retiramos os garavanzos e reservamos a masa. A continuación lavamos os porros, cortámolos lonxitudinalmente e logo en anacos non moi grosos, dun centímetro máis ou menos. Cortamos tamén a cebola en brunoise. Botamos un pouco de aceite nunha tixola e botamos os allos en anacos, dourámolos un pouco e engadimos a cebola. Refogamos a cebola a lume baixo cun pouco de sal durante 5 minutos e engadimos os porros en anacos, cociñamos outros 10 minutos a fogo baixo. Para preparar as zamburiñas, sacámolas das cunchas e limpámolas. Engadímolas aos porros e continuamos refogando uns minutos. Para a masa batemos os ovos nun cunco e botamos a nata para cociñar, moemos un pouco de pementa negra por enriba e remexemos. Engadimos os porros coas zamburiñas, mesturámolo todo e botámolo nos moldes coa masa follada con coidado de que todos leven zamburiñas. Finalmente metémolos 15 minutos no forno a 180 graos e servimos quentes. —Polo ao forno recheo O prato principal do noso menú e un polo recheo, pero tamén podería ser un capón. A elaboración non é moi complexa e ten un sabor exquisito. Elaboración: En primeiro lugar limpamos o polo e quitámoslle os restos de plumas e pelos. Lavamos e cortamos a mazá en cadrados quitándolle o corazón e reservamos. As castañas pelámolas e cocémolas durante 5 minutos, teñen que quedar algo crúas para que non se desfagan despois ao cociñalas. Unha vez preparado o recheo colocamos o polo nunha bandexa de forno, salgámolo e colocamos as castañas, a mazá e as pasas no seu interior. Botámoslle ao recheo o zume de medio limón e coa axuda de agulla e fío cosemos o traseiro do polo para que non escape o recheo. Untamos todo o polo coa manteiga de porco, colocámolo coa peituga cara abaixo para evitar que se seque e esprememos por enriba o zume da outra metade do limón. Metémolo no forno, que previamente quentamos a 180ºC. O tempo para cociñalo dependerá do tamaño do polo, para un mediano-grande precisaremos unhas 2 horas máis ou menos. Durante o tempo que está no forno cada 20 minutos collemos a salsiña que se vai formando no fondo da bandexa cunha culler e botámosllo por riba ao polo para evitar que fique seco. Os últimos 30 minutos dámoslle a volta e poñemos a peituga cara arriba para que se doure. Servimos co recheo a modo de gornición e aproveitamos a salsiña que se formou no fondo para botar por riba da carne unha vez cortado. —Bolachas do Apalpador Con estas vistosas bolachas podemos festexar cos máis cativos a chegada do Apalpador. Elaboración: Para facer as bolachas, comezamos mesturando a manteiga co azucre cun batedor de varas eléctrico e a continuación engadimos un ovo e a fariña peneirada pouco a pouco. Acabamos de amasar coas mans até ter unha masa homoxénea, facemos unha bola coa masa e deixámola repousar na neveira durante unha hora. Pasado este tempo botamos un chisco de fariña sobre o mesado e coa axuda dun rolete estendemos a masa e cortamos as bolachas cun cortapastas redondo. Colocámolas sobre papel de forno e pintámolas por enriba con un ovo batido. Para cociñalas metémolas no forno, que prequecemos a 180 graos, durante 10 minutos. Deixámolas arrefriar e decorámolas con fondant para facer a cara do Apalpador.