caderno de verán

O cociñeiro José Andrés, a quen se lle acaba de conceder o día 1 de xullo o Premio Princesa de Asturias á Concordia a causa do seu importante labor humanitario, está realizar por terceira vez o camiño de Santiago. Ten previsto chegar á cidade de Compostela esta mesma fin de semana. A boa noticia sorprendeu  o chef á súa chegada a Galiza.

Tradicionalmente, o verán é o período de maior actividade para a venda dos produtos artesáns galegos. Este ano, a Covid-19 causou tamén neste sector unha crise, derivada da baixa cifra de feiras realizadas e da menor afluencia de público e artesáns.

É a directora do ciclo 'De lugares e órganos', que nestes días lle pon música barroca a Compostela e adentra o visitante no mundo organístico máis alá do seu matiz litúrxico ou clásico e combínao con outros instrumentos e disciplinas artísticas.

O Pico Sacro é a estrela estival deste ano no concello de Boqueixón. O servizo de turismo municipal, coa coordinación da empresa Geotour Galicia, puxo en marcha unha serie de visitas xeolóxicas que se producen cada domingo e que teñen por obxectivo coñecer en profundidade este cume de 533 metros de altura sobre o val do Ulla e desde o que a visitante pode divisar o Barbanza, a ría de Arousa, Ordes, Arzúa ou mesmo Palas de Rei.

María Outeiro e César Lago fundaron hai case 30 anos a tenda Espadela, no número 58 da rúa do Vilar en Compostela. E agora, en plena era do coronavirus, volven emprender e fano adquirindo o local da que fora a libraría Encontros, no número 68 da mesma rúa. Falamos con César Lago deste primeiro mes desde a apertura do novo local,  da acollida que tivo entre a súa clientela e a turística e da filosofía que envolve o proxecto Espadela.  

Xaime Beiro é de Louro (Muros), traballa a animación 'motion graphics' e é afeccionado á fotografía e o vídeo subacuático. Falamos con el de quenllas, dos fondos mariños da costa galega e da situación dos océanos.

Guadi Galego comezou a súa traxectoria musical en 1997 coa banda Berrogüetto, desde entón formou parte de proxectos coma Espido, Nordestin@s ou aCadaCanto. No 2009 sacou ao mercado o seu primeiro disco 'Benzón' ao que seguiron 3 traballos máis e un disco recompilatorio, 'Inmersión', co que xira neste 2020 polo que recibiu o Premio á Promoción da Realidade Plurilingüe do Estado.

En marzo puxo no mercado o seu cuarto disco, 'As catedrais silenciadas', que non puido xirar por mor da Covid-19. Este verán, Xabier Díaz e Adufeiras de Salitre retoman pouco a pouco as actuacións en directo e planifican as xiras e concertos que tiveron que adiar.

Vén de recoller o premio Alecrín que entregou a Fegalcat (Federación de Entidades Culturais Galegas de Catalunya) en Castro Caldelas, en recoñecemento ao seu labor divulgador da nosa lingua e da nosa cultura. Asistiu a este evento "moi orgullosa porque o entrega xente galega que está a vivir en Cataluña e que tamén fai moito pola nosa identidade", asegura a artista.

Filla das culturas galega e palestina, Najla sempre estivo no mundo da música, fose coral ou tradicional, jazz ou rock ou world music. En formación constante, achegou a súa voz a grupos coma o Coro da Rá ou Os Tristáns até o seu debut en solitario, en 2013, co disco-libro 'Na lingua que eu falo', no que achegaba unha profunda mirada aos poemas de Rosalía. Agora xira con 'Ela sabe a sol'.

O novo circo colle folgos para recuperar o ritmo no mes de agosto logo do parón que supuxo a corentena por mor da COVID-19 e a cancelación de actuacións, festivais, etc. Nun repaso á axenda dos próximos días non pode faltar PistaCatro Produtora de Soños, empresa pioneira na creación, produción e distribución de espectáculos de Novo Circo e Cabaré. A compañía, que se fundou en Compostela en 2006, naceu "cunha dobre finalidade", reza na súa páxina web, "crear e producir os espectáculos individuais e do colectivo e darlle saída as nosas inquietudes e actitudes artísticas ademais de distribuír no mercado galego e internacional". 

Bieitta James e Pepe King son os integrantes desta banda que fusiona blues e soul coa idiosincrasia e a retranca galegas. Detrás deles están Iseo Agilda e Brais das Hortas, compañeiras na banda Sacha na Horta, que comezaron con versións de temas clásicos do blues "e non tan clásicos", puntualiza Iseo, e a base de improvisación acabaron irmanando o rhythm 'n' blues coas cantigas galegas.

Rubén Rodríguez (Riós, 1980), coñecido como Rubén Riós, embarcouse no confinamento na realización de directos en Facebook e Instagram conseguindo unha notable audiencia. Un cento de vídeos despois pensa seguir con esta actividade no tempo que lle deixen a rodaxe da serie 'Vento Norte', da televisión portuguesa, na que interpreta un anarquista español en 1918, e a preparación da súa primeira longametraxe.

Comeza a rodar o 17 de agosto unha longametraxe producida por Portocabo, 'Cuñados', onde comparte protagonismo con Xosé Touriñán e Federico Pérez. Ademais deste proxecto, Miguel de Lira continúa co seu grupo, Chévere, e retoman a xira da última produción, 'Curva España', coa que neste mes de agosto actuarán en Soria, Valladolid e Cariño.

Sabela Ramil (Ourol, 1993) déuse a coñecer a través do programa de televisión Operación Triunfo. A finais do ano pasado sacou a seu primeiro disco, 'Despedida', gravado en Lisboa e composto por 7 temas, 2 deles en galego. A pandemia da Covid-19 e o confinamento truncaron a preparación da súa xira na que segue a traballar este verán.