empapullar (I).- Encher a boca de comida.
Exemplo.- “Empapullas tanto a boca que nin mastigar podes.”
Lugar de escoita.- O Morrazo.
Fonte.- Roberto Rodríguez Piñeiro.
Outros apuntamentos.- Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Ramón Rocamonde Gómez e María Emma Tilves Pazos.
esgurichar.- Satisfacción dos sentidos, especialmente pola comida.
Exemplo.- “Sabe que esguricha!”
Lugar de escoita.- Muros.
Fonte.- Raquel Dosil Lago.
espenicar.- (Ademais de significados menos concretos) Remexer escollendo moito, pero ciscando a maioría da comida que se ten no prato (especialmente cando non gusta).
Exemplo.- “Deixa de espenicar e remata de comer dunha vez.”
Lugar de escoita.- Monforte e Terras de Lemos.
Fonte.- Renée Huerta Latrille.
follazo.- Filloa algo grosa que se fai na tixola cun amoado de auga, ovos, fariña e sal.
Lugar de escoita.- Cerceda.
Fonte.- Mª Jesús Rey Liñares./CPI O Cruce de Cerceda.
langrina.- (Verba da familia doutras recollidas en dicionarios como alangrear ou langrear) Fame.
Lugar de escoita.- Foz.
Fonte.- Olaia Rocha Fraga.
marmear.- Comer.
Lugar de escoita.- A Pobra do Brollón e comarca.
Fonte.- Orcelina Parada Cortiñas.