Rusia anuncia a retirada da cidade de Khersón e do oeste do Dniéper

Zelenski define a situación en Donetsk como "difícil" mentres medios internacionais sitúan Khersón como o principal foco dos combates nas vindeiras semanas, mais só na marxe leste do río Dniéper, tras o anuncio da retirada das tropas rusas do resto da rexión.
Vladimir Putin, presidente de Rusia. (Foto: Kremlin / dpa)
photo_camera Vladimir Putin, presidente de Rusia. (Foto: Kremlin / dpa)

Sergei Shoigu, ministro de Defensa de Rusia, trasladou onte que ordenou ao Exército que se retire da marxe oeste do río Dniéper na rexión de Khersón, o que implica a retirada da cidade homónima e capital do oblast. Argumentando a dificultade de manter o abastecemento á urbe, Shoigu indicou que “a vida e saúde dos militares rusos son sempre unha prioridade”, así como que “temos que ter en conta as ameazas á poboación civil”.

No bando ucraíno, o conselleiro principal do presidente Volodimir Zelenski, Mykhailo Podolyak, aseverou que aínda quedan tropas rusas na cidade. “Até que a bandeira ucraína ondee sobre Khersón, non ten sentido falar dunha retirada rusa”, destacou.

Pola súa parte, Zelenski explicou que a situación na fronte de guerra na rexión de Donetsk é “difícil”, sinalando que as tropas ucraínas están a atacar as posicións do Exército ruso para permitir as operacións da infantería na área de Bakhmut, un dos principais obxectivos militares de Moscova nestes intres.

Corredor humanitario

Os Estados Unidos e a Unión Europea están a obstaculizar as exportacións de grans e fertilizantes rusos por medio de sancións que inciden nos seguros de transporte, acceso aos portos e outros elementos loxísticos, sostivo onte a voceira do Ministerio de Asuntos Exteriores de Moscova, Maria Zajarova, en declaracións recollidas por Reuters.

“Teremos isto en conta á hora de decidir a prórroga do acordo”, reiterou, en referencia ao pacto para permitir a saída de cereais ucraínos polos portos do mar Negro asinado xunta Kíiv, Ancara e a Organización das Nacións Unidas (ONU), e que finaliza o próximo 19 de novembro. Este acordo tamén inclúe a liberación das trabas que impiden a saída dos produtos de Rusia, un dos maiores provedores mundiais neste eido.

A finais de outubro Rusia suspendeu durante catro días a súa participación no corredor humanitario, tras un ataque ucraíno contra buques militares e civís que participaban na ruta, volvendo ao acordo despois de declarar ter recibido garantías do resto de países.

Turquía frea a entrada na OTAN dos países nórdicos

Ao respecto da entrada de Suecia e Finlandia na Organización do Tratado do Atlántico Norte, o presidente de Turquía, Recep Tayyip Erdogan, adiou até despois das eleccións xerais de xuño de 2023 a decisión final do lexislativo do país, o único onda Hungría que aínda non ratificou o ingreso dos países nórdicos.

comentarios