A Xunta Militar que goberna Níxer desde que depuxo a finais de xullo o presidente Mohamed Bazoum autorizou os Exércitos de Burkina Faso e Malí a “intervir no territorio de Níxer en caso de agresión”, transcendeu a sexta feira, no marco da posibilidade dunha intervención militar por parte da Comunidade Económica de Estados de África Occidental (Cedeao) para restituír Bazoum.
Este permiso foi emitido após a visita a quinta feira a Niamey, a capital nixerina, de Olivia Rouamba e Abdoulaye Diop, titulares de Exteriores de Burkina Faso e Malí respectivamente, que se reuniron co líder da Xunta Militar, Abdourahamane Tchiani.
Na xuntanza, salientaron a “necesidade de fortalecer os mecanismos de cooperación, o intercambio de datos de Intelixencia e as operacións conxuntas co fin de aumentar a eficiencia para contrarrestar a actividade dos grupos terroristas”.
Asemade, medios estatais nixerinos trasladaron que Uagadugú e Bamaco despregaron avións de combate en Níxer para “responder a calquera ataque”. Os dous países -gobernados por militares tras golpes de Estado cunha marcada mensaxe antiimperialista, e que expulsaron o Exército francés do seu territorio- foron os primeiros en rexeitar a saída militar impulsada pola Cedeao co aval de Estados como Francia, que tiña en Bazoum o seu principal aliado na rexión do Sahel, e afirmaron que un ataque a Níxer sería considerado como unha declaración de guerra contra eles.
O presidente de Nixeria, Bola Tinubu, que lidera na Cedeao a defensa dunha intervención militar en Níxer en paralelo a unha crise política interna, insistiu a sexta feira en que intenta “frear” esta opción. Amais, asegurou que se a Cedeao se aparta da vía militar “outras persoas reaccionarán, algunhas fóra de control, son eu quen as sostén”, nunha situación que definiu como “espiñenta”.
Rexeitamento no norte de Nixeria á intervención
A intervención militar xera un importante rexeitamento sobre todo no norte de Nixeria, que agrupa a maioría do pobo hausa no país, un grupo étnico ao que pertence arredor da metade da poboación nixerina. Os hausa tamén conforman boa parte das Forzas Armadas nixerianas, detallan medios especializados, mentres que Tinubu pertence ao pobo yoruba.
Isto levou a que o Exército de Nixeria tivera que desmentir a mediados de agosto supostas peticións para que perpetrase un golpe de Estado e apartase Tinubu do poder.
