Os países de África Occidental frean polo momento a intervención militar en Níxer

A Comunidade Económica de Estados de África Occidental (Cedeao) transmitiu a segunda feira que a quinta desenvolverá unha cimeira de xefes de Estado co fin de acordar os próximos pasos para abordar a situación en Níxer, freando cando menos de forma temporal a posibilidade dunha intervención militar para restituír no poder o presidente Mohamed Bazoum, unha opción contemplada pola entidade no ultimato feito aos militares nixerinos que derrocaron a Bazoum, e que rematou o domingo. A decisión produciuse no medio da aparición de cada vez máis voces críticas ante unha hipotética operación militar, reclamando ao tempo que se intensifiquen os intentos de buscar unha saída negociada. Ademais de Malí, Burkina Faso, o Chad ou Guinea-Conakry, tamén Alxeria cuestionou a vía militar, incidindo en que suporía unha “ameaza directa”. Porén, as dúbidas sobre a intervención militar tamén se espallaron en dous dos catro países que amosaron a súa disposición a participar, principalmente no Estado que lidera a demanda dunha misión militar, Nixeria. Alí, o Senado rexeitou a fin de semana a petición do presidente Bola Tinubu para apoiar a intervención, detallando que aínda non solicitou unha autorización formal para entrar en guerra e instándoo a apostar pola vía diplomática. Amais, indicou que as ameazas de grupos terroristas xihadistas e de bandas criminais impiden que as súas Forzas Armadas conten con recursos dabondo para “librar unha guerra no exterior”, recolle o Premium Times. Se o Senado, que fixo énfase na “relación moi harmoniosa con Níxer” para vetar a proposta, non dá luz verde á intervención, a única opción de Tinubu sería considerar que existe un risco inminente para a seguridade nacional, o que lle permitiría activala sen o apoio das e dos senadores. Tamén en Senegal as forzas opositoras puxeron en dúbida os beneficios da posíbel intervención militar. O ex ministro e deputado Thierno Alassane Sall advertiu de que a operación pode provocar “unha das guerras máis mortíferas” da zona a medida que os Estados comezan a agruparse a favor ou en contra da medida, e até Burkina Faso e Malí afirmaron que considerarán un ataque a Níxer como unha declaración de guerra a ambos os dous países. En paralelo, a actualidade política de Dakar segue centrada nas protestas tras a disolución da principal formación opositora, que deixaron dúas mortes. Mentres que os Estados Unidos e Francia trasladaron o apoio ás decisións da Cedeao sobre o futuro de Bazoum, o seu principal aliado no Sahel, Alemaña e Italia reiteraron a segunda feira a necesidade de dar prioridade aos esforzos diplomáticos, á vez que Rusia sinalou que é “pouco probábel” que unha intervención militar poida “cambiar a situación”. Sexa como for, a opción militar está aínda lonxe de ser descartada, tanto polos intereses occidentais en xogo en Níxer como polas consecuencias internas en Nixeria dun fracaso á hora de restituír a Bazoum, o que comprometería o mandato de Tinubu, que comezou hai uns meses. Nese sentido, a China, que constrúe un oleoduto entre Níxer e Benín, indicou á súa cidadanía en territorio nixerino que deben marchar se non ten motivos para permanecer no país, recomendando absterse de viaxar ao lugar, namentres, Francia pediu “limitar as viaxes” após evacuar os seus nacionais e doutros países da Unión Europea. O Exército nixerino non dá marcha atrás A pesar dos intentos de negociar a saída da Xunta Militar do poder de Níxer por parte da Cedeao e outros actores, os militares, que defenderon o golpe de Estado como produto do aumento da inseguridade a raíz dos ataques terroristas de grupos xihadistas, negáronse a ceder perante a presión e decretaron o feche do espazo aéreo nixerino, ameazando cunha “resposta enérxica e inmediata” a calquera intento de violalo. Ao feche desta edición, Flightradar24 corroboraba que non se estaban producindo voos sobre o país. Asemade, o Exército fixo un chamamento á mocidade para “estar preparados para defender a patria”, debullando que “segue con atención os preparativos desta guerra por delegación” dunha “potencia estranxeira” que se estaría a coordinar coa Cedeao, logo de informar de que detectou “unha despregadura previa para a preparación da intervención en dous países de África Central”, polo que subliñou que “calquera Estado involucrado será considerado co belixerante”. Ademais do feche do aeroporto de Niamey, a capital, tamén se reportou a creación de grupos de cidadáns que organizaron brigadas de vixilancia para descubrir a presenza de potenciais axentes estranxeiros en preparación da intervención ou transportes de armas. Todo isto entre múltiples mostras de apoio da poboación á sublevación, que se produciu sen derramamento de sangue, e no marco dunha reiterada mensaxe anticolonial intensificada pola resposta francesa, o que provocou a ruptura por parte da Xunta Militar de todos os acordos de cooperación militar con París. O domingo, 30.000 persoas segundo AFP amosaron o seu apoio aos militares no estadio Xeneral Seyni-Kountché. Uagadugú e Bamaco envían unha delegación a Niamey Os militares que gobernan en Burkina Faso e Malí desde os golpes de Estado de 2022 e 2021 respectivamente, forzando a saída das tropas francesas do seu territorio e achegándose a Rusia, anunciaron a segunda feira o envío dunha delegación a Niamey para “demostrar a solidariedade dos dous países co irmán pobo de Níxer”. Apenas unhas horas antes, París resolveu suspender a súa axuda económica ao primeiro país, algo que non fixera tras o golpe de Estado en Uagadugú. Entrementres, Alex Vines, que dirixe o programa de África da entidade británica de estudos sobre asuntos internacionais Chatham House, previu das consecuencias humanitarias das sancións coercitivas da Cedeao contra Níxer -un dos países máis empobrecidos do mundo-, destacando que “son moi contundentes” e que algunhas delas son indiscriminadas. Expansión do xihadismo Aínda que os países occidentais fixeron fincapé no risco de expansión dos grupos xihadistas no caso de que Níxer fique desestabilizado polo golpe de Estado, é precisamente isto o que xera dúbidas entre os países da Cedeao sobre a intervención, pois de derivar nunha guerra obrigaría a retirar das operacións aos militares de varios países que están a protagonizar a loita contra o terrorismo, como acontece en Nixeria.