O Exército de Níxer advirte de que París prepara unha intervención militar

Francia, antigo colonizador de Níxer, prepárase para “intervir militarmente” no país africano e restaurar no poder o seu aliado, o presidente Mohamed Bazoum, trasladou a segunda feira a Xunta Militar encabezada polo xeneral Abdourahmane Tchiani, que detivo a pasada cuarta feira Bazoum e a súa familia, suspendendo a Constitución e disolvendo as institucións da Sétima República nixerina. Nun comunicado dirixido á poboación, o autoproclamado Consello Nacional para a Salvagarda da Patria sostivo que autoridades de París participaron nunha “reunión co Estado Maior da Garda Nacional de Níxer [un corpo paramilitar baixo o control do Ministerio de Interior] para obter as autorizacións políticas e militares precisas” para unha intervención militar por parte de Hassoumi Massoudou, titular de Exteriores de Bazoum que se autodenominou líder do Goberno até a súa liberación. Entrementres, declarou que a exportación de uranio e ouro -as dúas principais exportacións do país- con destino a Francia fica suspendida. Ao ser interrogado ao respecto, “o Ministerio de Asuntos Exteriores francés non confirmou nin negou a acusación”, recolle Reuters, e insistiu en que só recoñecen a Bazoum como a autoridade lexítima en Níxer. Poucas horas antes, a Presidencia do país europeo -ocupada por Emmanuel Macron- insistiu en que “calquera que ataque cidadáns franceses, o Exército, diplomáticos ou empresas francesas verá Francia tomar represalias de inmediato e con decisión”, asegurando que “non tolerarán” agresións contra "intereses” franceses, tras os intentos o domingo de entrar na súa embaixada en Niamey, a capital nixerina, no contexto dunha manifestación na que milleiros de persoas apoiaron o golpe entre berros contra Francia e as operacións militares anti xihadistas que impulsa na rexión, e a prol dos militares, Rusia e o seu presidente, Vladimir Putin. Un xornalista citado por Le Monde apunta que “tantos manifestantes son inauditos en Niamey". Francia planea atacar Níxer para "liberar o presidente deposto" Mohamed Bazoum As persoas mobilizadas arrincaron a placa da embaixada e substituírona por bandeiras rusas e nixerinas, e até seis persoas ficaron feridas tras os disparos e lanzamentos de bombas lacrimóxenas por parte das forzas francesas, sinalou a Xunta Militar. Pola súa parte, os Estados Unidos, a Unión Europea (UE) e o Reino Unido comunicaron o seu apoio ás medidas aprobadas o domingo pola Comunidade Económica de Estados de África Occidental (Cedeao), que outorgou á Xunta Militar unha semana para restituír a Bazoum antes de aprobar “as medidas necesarias”, que “poden incluír o uso da forza”. Tamén suspendeu as “transaccións comerciais e financeiras” dos Estados membros con Níxer e resolveu conxelar “os activos dos militares involucrados no intento de golpe”. Pola súa parte, Washington e Bruxelas suspenderon a cooperación co país -que recibe arredor de 1.800 millóns de euros anuais en axuda para o desenvolvemento segundo o Banco Mundial- após condenar o golpe de Estado, mentres que Beijing reclamou diálogo e evitar o uso da forza para resolver a situación e o Kremlin defendeu “o pronto restabelecemento da legalidade” para que Níxer “volva canto antes á senda constitucional”. Ao tempo, tamén se están a desenvolver iniciativas de diálogo. Nese sentido, o xefe da Xunta Militar do Chad, Mahamat Déby, desprazouse a Níxer e xuntouse con Tchiani e con Bazoum a petición da Cedeao, a pesar de que Xamena non pertence ao organismo. Déby é un dos aliados de París na zona, e asumiu o poder após un golpe de Estado en 2021 a raíz da morte do líder do país, o seu pai Idriss Déby, tamén aliado de Francia e que asumiu o poder en 1990 pola vía militar. En paralelo, outro dos apoios franceses, o predecesor de Bazoum no liderado nixerino, Mahamadou Issoufou, transmitiu que está negociando para lograr a liberación do mandatario e a fin do golpe de Estado. Issoufou designou en 2011 a Tchiani como xefe da Garda Presidencial. Os golpistas nomean líder en Níxer mentres o país recupera a calma Presenza francesa O golpe de Estado en Níxer foi xustificado polos militares pola “degradación da situación de seguridade”, no medio da forte presenza de grupos terroristas xihadistas vinculados con Al Qaeda e o Estado Islámico na rexión do Sahel. Isto tamén foi un dos eixos que levaron aos golpes de Estado en Malí en 2021 e en Burkina Faso en 2022 cunha forte mensaxe antiimperialista, logo de case unha década de presenza militar francesa nestes tres países, Mauritania e o Chad para loitar contra o terrorismo nas súas ex colonias e frear a súa chegada á UE. O fracaso da denominada operación Barkhane á hora de loitar contra os grupos xihadistas e os choques constantes coa poboación local dos militares franceses, que derivaron en múltiples mortes nunha zona na que París conta con intereses económicos, levaron as Xuntas Militares de Malí e Burkina Faso a exixir a retirada das tropas francesas, que xa non se atopan no seu territorio. Malia que Macron reiterou que esta operación sería substituída por unha misión internacional con máis Estados, finalmente anunciou en novembro de 2022 a súa fin, pero mantendo a presenza militar no resto de países. O uranio, chave nun dos países máis empobrecidos do planeta A extracción de uranio impulsa en Níxer a neocolonización francesa As Forzas Armadas francesas contan con arredor de 1.500 soldados en Níxer, o que para France24 responde ao combate contra o terrorismo e ao “resgardo dos intereses galos no marco da expansión” do grupo ruso de mercenarios Wagner na área, con presenza confirmada en Malí. Asemade, Washington ten dúas bases de drones e 800 militares, amais de usar Níxer como a base principal para os seus grupos de mercenarios no Sahel. Até o golpe de Estado, Niamey era o principal aliado na zona de París e Washington. Amais, Níxer é chave para a seguridade enerxética francesa, ao prover as minas controladas por empresas francesas no país africano de “boa parte do uranio” que precisan as centrais nucleares francesas, afirman os medios galos, engadindo que “Francia estaba cómoda até o golpe”. Así e todo o papel chave que xoga neste ámbito para Francia desde a década de 1970, no Índice de Desenvolvemento Humano da Organización das Nacións Unidas Níxer ocupa o posto 189 de 191 Estados. Máis de 70% dos seus 26 millóns de habitantes sofren inseguridade alimentaria e máis da metade das crianzas teñen desnutrición. Ademais, máis de 80% da poboación carece de acceso á electricidade.