Con case tres millóns de votos de diferenza fronte ao progresista Sergio Massa, candidato da Unión pola Patria e ministro de Economía, Javier Milei, da extrema dereita da Liberdade Avanza, fíxose co triunfo na segunda volta das eleccións presidenciais na Arxentina, segundo se confirmou na madrugada de hoxe, e será o novo mandatario a partir do 10 de decembro, cando tome posesión en substitución de Alberto Fernández.
Será a primeira vez que a extrema dereita volva ao Goberno despois da ditadura militar que rematou hai catro décadas.
Malia que as enquisas outorgaban posibilidades a ambos os dous candidatos, Milei superou Massa por máis de 10 puntos (55,69% a 44,3%) nuns comicios con 76% de participación. Nunha das primeiras entrevistas após a vitoria, o ultradereitista proclamou que “todo o que poida estar en mans do sector privado vai estar en mans do sector privado”, en referencia a empresas públicas como a petroleira YPF.
Asemade, fixo fincapé na aplicación dunha axenda que inclúe a fin do Banco Central ou das axudas públicas, así como a desaparición do peso, adiantando un “axuste fiscal” que segundo el “non pagarán os arxentinos de ben senón os políticos”.
Massa, que se impuxera na primeira volta das presidenciais con 37% dos sufraxios por 30% de Milei, aceptou a derrota electoral antes de facerse públicos os resultados oficiais e desbotou manterse á cabeza da agrupación progresista, recalcando que “hoxe acaba unha etapa da miña vida política”. O secretario xeral da Presidencia, Julio Vitobello, defendeu o desenvolvemento dos comicios e a transparencia no decorrer da xornada, negando as acusacións de fraude que a extrema dereita lanzara poucos días antes das votacións.
En todo caso, e a pesar de ser elixido presidente, Milei terá que negociar cada medida de forma individual para que sexan aceptadas polo Congreso, onde as e os representantes da súa forza contan con menos de 15% dos asentos na Cámara de Deputados e de 10% no Senado.
A isto hai que engadir que a coalición conservadora Xuntos polo Cambio, cuxa candidata, Patricia Bullrich, ofreceulle o seu apoio na segunda volta, está ao bordo da ruptura por ese motivo, polo que as súas posibilidades de conseguir o apoio dunha maioría lexislativa clara son moi baixas, e algo que no mellor dos casos só acontecería na Cámara Baixa.
No sistema político arxentino, do Congreso tamén dependen os decretos de urxencia ou a convocatoria de plebiscitos, unha das propostas de Milei para forzar a aprobación de reformas ás que o lexislativo negue a súa aprobación.
O certo é que “Milei ten unha debilidade estrutural para poder avanzar na súa axenda”, explica o politólogo Sergio Berensztein, que advirte que “nun país federal como a Arxentina, onde os gobernadores teñen un peso extraordinario, non ten un só gobernador do seu partido”, polo que afirmou que terá “unha debilidade enorme”.
Lonxe dos Brics
No que atinxe á política exterior, Milei insistira en múltiples ocasións en que se afastaría do Brasil e a China por “comunistas” e ataría lazos cos Estados Unidos e Israel. De feito, visitará estes dous países antes da súa toma de posesión.
A súa elección tamén impedirá que a Arxentina entre no grupo Brics o vindeiro 1 de xaneiro, algo que confirmou Diana Mondino, principal candidata a dirixir Exteriores no mandato de Milei, que salientou que non hai un “interese especial” no ingreso.
