Xuntos polo Cambio, a principal coalición de forzas conservadoras na Arxentina, e que levou á Presidencia a Mauricio Macri entre 2015 e 2019, está ao bordo da ruptura tras anunciar a súa candidata na primeira volta das eleccións presidenciais, Patricia Bullrich, que apoiará na segunda volta Javier Milei, da extrema dereita da Liberdade Avanza, contra o progresista Sergio Massa, de Unión pola Patria.
Larreta frea a decisión do PRO
A pesar da decisión de Bullrich, á que Milei ofreceu o Ministerio de Seguridade, a súa formación, Proposta Republicana (PRO), aínda non tomou unha decisión, tras a negativa na madrugada de hoxe de Horacio Larreta, alcalde de Bos Aires que foi derrotado nas primarias, a aceptar a decisión, incidindo en que Milei “é un salto ao baleiro”, nunha intervención na que tamén criticou que Bullrich e Macri se reuniran co ultradereitista.
Así e todo, negouse a apoiar Massa, incidindo en que non pode “acompañar ningún dos dous candidatos que van facer dano aos arxentinos” e reclamando ficar na oposición.
Parte dos radicais apoiarán Massa
A Unión Cívica Radical resolveu declararse neutral na segunda volta. Gerardo Morales, presidente do Comité Nacional do partido, acusou Bullrich e Macri de ser “os grandes responsábeis de pór en risco” a coalición coa súa decisión, coa que se colocaron “fóra” de Xuntos polo Cambio.
Con todo, a equidistancia entre ambos os dous candidatos non foi aceptada por varios grupos dentro dos radicais, como é o caso dos membros da rexión do Norte Grande, que se pronunciaron a favor de Massa.
O líder doutra formación integrada, Maximiliano Ferraro, da Coalición Cívica -que optou pola neutralidade-, tamén arremeteu contra os líderes do PRO, considerando “vergoñento” o apoio á extrema dereita.
