O prezo medio do litro de leite que se paga a gandeiros na Galiza afundiuse até os 49 céntimos en agosto -2,3 céntimos menos que os 51,3 céntimos de xullo-, de forma que por primeira vez baixa dos 50 céntimos desde setembro de 2022, segundo datos do Ministerio de Agricultura.
Deste modo, o prezo do leite na Galiza afástase da media estatal, de 51,8 céntimos. O feito é que segue á cola do Estado, mais agora está 2,8 céntimos por baixo da media do Estado, cando o mes anterior a fenda era de 1,7 céntimos.
De feito, Galiza é o único territorio por baixo dos 50 céntimos. Contrasta con que en Asturias páganse 54,3 céntimos por litro de media.
Esta caída é aínda máis acusada no que vai de 2023 se se ten en conta que a comezos de ano marcábanse cifras récord por litro, até os 58,9 céntimos chegou a elevarse en febreiro.
Perda de produtores
Pola súa parte, prosegue a continua caída de produtores galegos que realizan entregas, 5.792 en agosto, o que supón 32 menos que o mes anterior.
Galiza entrou en 2023 baixando da barreira dos 6.000 produtores e continúa en descenso. Con todo, supoñen 56,5% do total de máis de 10.000 gandeiros lácteos no Estado español.
A produción láctea descendeu a 251.805 toneladas en agosto, case 8.000 toneladas menos que en xullo. No acumulado dos oito primeiros meses do ano, a produción galega supón 41% do total do Estado. 66% das entregas fixéronse no propio territorio galego e o 34% restante levaron fóra do país.
