Os flocos de millo e as bolachas non só son para o almorzo

Lagostinos rebozados en flocos de millo con maionesa picante Este prato é ideal para o aperitivo. Os lagostinos fican moi crocantes e a maionesa picante dálle un toque delicioso. Ingredientes (2 persoas): 400 g de lagostinos, 70 g de flocos de millo do almorzo (sen azucre), 2 ovos aceite de oliva suave, 3 culleres de maionesa, 2 culleres de sobremesa de mollo Sriracha. Elaboración: Podemos empregar lagostinos frescos ou desconxelados. Comezamos tirándolles a cabeza e a casca, deixando a última parte da cola para decorar. Unha vez pelados salgámolos un pouco e cravámolos en espetos de madeira comezando pola parte da cola. Esto axudaranos a manipulalos mellor e ademais evitaremos que se encollan ao fritilos. Nun prato batemos os dous ovos e reservamos. Noutro prato botamos os flocos de millo e coa axuda dun morteiro esmagámolos un pouco. Poñemos a quentar abundante aceite de oliva nunha tixola ou cazo e imos mollando os lagostinos en ovo, logo pasándoos polos flocos até que queden ben cubertos e finalmente fritíndoos até que fiquen dourados. Despois de fritilos colocámolos sobre un prato con papel absorvente para tirar o aceite sobrante. Finalmente facemos o mollo de maionesa picante. Para iso mesturamos a maionesa coa sriracha, podemos botarlle máis ou menos mollo picante segundo o gusto. Servimos os lagostinos nos espetos acompañados do mollo nun cunco. Arepas con carne de polo desfiada e queixo de Arzúa As arepas son unha comida moi famosa en países como Venezuela ou Colombia. Son unha especie de tortiñas feitas con auga e fariña de millo, cómense como acompañante ou recheas do que máis nos guste. Ingredientes (2 persoas). Para o recheo: 2 peitugas de polo, 3 cebolas, 1 pemento vermello, 3 allos, 2 tomates, 3 caienas secas, 1 aguacate, queixo de Arzúa. Para a masa: 250 g de fariña de millo branco precocida (a máis coñecida é da marca P.A.N.), 450 g de auga, 1 culler de aceite, 1 chisco de sal. Elaboración: Comezamos preparando a masa. Botamos nun cunco a fariña de millo e o sal e mesturamos. É importante que sexa fariña de millo branco precocida, a fariña de millo normal non serve. Engadimos a auga pouco a pouco e imos remexendo cunha culler de madeira. Amasamos coas mans e deixamos repousar 15 ou 20 minutos. Unha vez repousada a masa, mollamos as mans e facemos oito boliñas. Deixamos un anaco sobre un pano. Para facer as arepas imos empregar unha tixola ou unha prancha, antes untámola un pouco cun pano de papel e un pouco aceite para evitar que se peguen. Imos poñendo as boliñas na tixola e esmagámolas para aplanalas, deixamos cinco minutos de cada lado até que collan algo de cor. Para o recheo cocemos nunha pota con auga e un pouco de sal as peitugas de polo acompañadas dunha cebola enteira e pelada, deixamos 30 minutos a lume medio. Mentras tanto picamos as outras dúas cebolas, os allos e o pemento en anaquiños e rustrimos cun pouco de aceite e sal, pasados uns minutos engadimos os dous tomates cortados en anacos. Cando o polo estea listo, sacámolo da auga e gardamos o caldo. Desfiamos as peitugas coa axuda de dous garfos. Botamos as caienas cortadas en anacos e o polo desfiado ao rustrido de pemento, cebola e tomate e imos engadindo culleradas do caldo onde cocimos as peitugas, pasandoo antes por un coador. Cando as verduriñas estean ben pasadas deixamos de engadir caldo, agardamos a que reduza un pouco o líquido e retiramos do lume. Pelamos e esmagamos cun garfo o aguacate nun cunco. Finalmente abrimos as arepas cun coitelo e enchémolas coa carne, o aguacate e un pouco de queixo de Arzúa. Servimos quentiñas. Torta rápida de limón e bolachas Esta torta é case máxica, faise moi rápido e o resultado é marabilloso. Ten un sabor moi fresco e suave, ideal para rematar o xantar con bo sabor de boca. Ingredientes (2 persoas): 370 g de leite condensado, 200 ml de nata, 200 ml de leite, 300 g de queixo crema, 175 ml de zume de limón (4 limóns aprox), 175 g de bolachas maría. Elaboración: Imos empregar o bordo dun molde desmontábel de 19 centímetros de diámetro máis ou menos. Colocamos o bordo do molde, sen a base, no prato no que imos servir a torta e cubrímolo con papel de forno. Podemos untar cun pouco de manteiga o molde para axudar a pegar mellor o papel. Nun cunco botamos o leite condensado, a nata, o leite e o queixo. Batemos á man cun batedor de globo até que fique homoxéneo. Teremos unha crema moi líquida polo momento. Cortamos un dos limóns pola metade e cortamos dous toros finiños. Imos partir estes toros á metade e colocalos nos bordos do molde para decorar. Logo esprememos os limóns até obter 175ml de zume. Cando teñamos o zume preparado, imos engadíndoo á mestura de nata e leite pouco a pouco mentres batemos a man co batedor de globo. Observaremos como comeza a espesar até ter unha crema máis densa. Integramos ben e reservamos. Despois colocamos no prato co molde unha primeira capa de crema, e logo a primeira capa de bolachas. Repetimos o proceso até ter catro ou cinco capas de bolachas e estendemos ben a última capa de crema. Deixamos repousar na neveira unhas cinco ou seis horas até que se solidifique, e antes de servir desmoldamos e relamos un chisco de limón por enriba. Tamén podemos decorar con toros de limón ou folliñas de menta.