Catro campañas de publicidade machistas compiten por ter "a dubidosa honra" de ser escollidas como 'O Peor Anuncio de 2022' na décimo terceira edición destes premios que elixen socios e simpatizantes de FACUA-Consumidores en Acción.
Nesta ocasión, o premio dispútase entre dúas campañas que "sexualizan" as mulleres, unha que as "culpabiliza da violencia de xénero" e unha última que "as ataca se os seus corpos non cumpren cos canons estéticos e non son normativos".
Os anuncios
Trátase da "desafortunada campaña" contra a violencia machista da Xunta da Galiza; do anuncio de lavado de coches dun grupo de gasolineiras; da publicidade Operación Feira dun ximnasio sevillano; e da "caravana de mulleres" que promocionou unha discoteca asturiana.
Facua deu a coñecer os nomeados este 8 de marzo, Día Internacional das Mulleres Traballadoras, para pór o acento "en como a publicidade continúa tratándoas como meros obxectos, reclamos para vender un produto e transmiten unha idea aínda estereotipada do que é ser muller, na cal se lle atribúen valores que teñen pouco ou nada que ver coas súas capacidades e moito co seu aspecto físico".
A campaña está a difundirse a través das redes sociais coa etiqueta #ElAnuncioMásMachista. Os premios teñen outras dúas categorías: O Peor Abuso e A Peor Empresa, cuxos nomeados se darán a coñecer nos próximos días.
Os premios
A asociación convoca estes premios desde 2010 para censurar os graves abusos que se producen no mercado e promover prácticas responsábeis das empresas cos consumidores e nas súas relacións con estes e as organizacións que representan os seus intereses.
