O Tribunal Superior de Xustiza da Galicia (TSXG) avalou que a Universidade de Santiago de Compostela (USC) anulase a matrícula dun estudante de Úbeda (Xaén) despois de que, ao realizar a preinscrición, introducise unha nota de selectividade máis alta da que tiña realmente.
A pesar de que na sentenza, emitida o pasado 4 de outubro, non consta acreditado que o estudante falsease as notas, si é certo que a cualificación introducida no sistema 'Nerta' (11,388), e pola que nun principio logrou entrar no Grao en Enfermaría do Campus de Lugo, non se corresponde coa real (9,372).
O TSXG confirmou así unha sentenza previa do Xulgado do Contencioso-Administrativo de Santiago, que anulaba a matrícula e desestimaba unha indemnización que solicitaba o mozo e que ascendía a máis de 35.000 euros, ao sumar danos morais, os desprazamentos até Compostela e o soldo dun enfermeiro nun ano (uns 28.600 euros).
O caso
O caso remóntase ao curso 2021/22, cando este estudante se someteu á ABAU e obtivo unha nota de 9,372, ao sumar 7,274 da fase xeral e outros 2,098 puntos pola específica. O alumno solicitou praza en varias universidades, entre elas a compostelá.
Ao non realizar a selectividade na Galiza, no momento da preinscrición na plataforma 'Nerta' as notas non se pasan de maneira automática, senón que é o propio aspirante o que debe encher manualmente as notas obtidas -é unha declaración responsábel, tal e como lembra o TSXG na súa sentenza- e, posteriormente, a universidade en cuestión comproba que todo estea correcto.
Sexa como for -o demandante non admite nin que falsease as súas cualificacións nin que cometese un erro-, este mozo accedeu ao Grao en Enfermaría da USC en Lugo cunha nota de 11,388, ao estar lixeiramente por encima da de corte. Así, formalizou a súa matrícula o 26 de xullo de 2021.
Con todo, o 26 de outubro dese mesmo ano, o Reitorado da Universidade de Santiago notificoulle o proceso para a anulación da matrícula. Un mes máis tarde, o 26 de novembro, emitiu unha resolución neste mesmo sentido.
Esgotada a vía administrativa, o alumno acudiu aos tribunais para que se lle readmitise e se lle indemnizase por máis de 35.200 euros. Con todo, foi desestimado en primeira instancia. O mozo recorreu esta sentenza insistindo en que "en ningún momento falseou as súas cualificacións" e en que el gravou ben a súa nota.
Agora, o TSXG confirmou a decisión do xulgado de Santiago porque "non achega documento algún que acredite" que as cualificacións que el puxo en 'Nerta' sexan diferentes que as que aparecen no expediente administrativo e que provocaron que fose admitido na carreira.
O alto tribunal galego non entra a valorar se se falsearon ou non as notas, pero si recalca que "existe unha clara discrepancia" entre os números rexistrados e as cualificacións reais.
"Das notas que realmente ten o recorrente, constátase claramente que non alcanza a puntuación necesaria para o Grao de Enfermaría en Lugo. O recorrente ten a obriga de coñecer as súas notas e de introducilas correctamente no sistema", resolve o TSXG.
Por tanto, o TSXG desestima o seu recurso e confirma a non admisión deste mozo de Úbeda, que ademais deberá pagar as costas do proceso até 1.000 euros.
