Quintela de Leirado (comarca de Celanova) conserva ao único alcalde ‘preconstitucional’ que seguirá a gobernar na Galiza: José Antonio Pérez Cortés (PP), que foi proclamado de novo rexedor, tras recibir un amplo apoio nas urnas o pasado 28 de maio.
De feito, Pérez Cortes, que acumula 47 anos co bastón de mando municipal, dirixirá un goberno monocolor, integrado por sete edís populares.
No polo oposto, a circunscrición de Ourense despediu este sábado o outro rexedor ‘preconstitucional’ que quedaba no país: o franquista Senén Pousa, quen deixou a Alcaldía aínda que deu entender que seguirá como concelleiro na localidade que gobernaba desde 1974.
Enfado con Baltar
Pousa presentouse durante décadas como candidato do PP, pero nas últimas eleccións a formación popular optou por colocar outro candidato na localidade: Fernando Taboada.
Profundamente molesto con Manuel Baltar, contra quen non escatimou críticas públicas, Pousa presentouse cun partido independente e obtivo un concelleiro dunha corporación de sete. Outra formación independente logrou outra acta, mentres que os socialistas cultivaron dous e o PP, tres.
“Orgulloso franquista”
Este sábado cada formación votou por si mesma en Beade, de forma que Fernado Taboada colleu o bastón de mando como candidato do partido máis votado.
Pousa viviu unha traxectoria política marcada tanto polas consecutivas maiorías absolutas que o mantiveron medio século como rexedor como pola súa reivindicación pública do franquismo e do ditador Francisco Franco, por quen chegou a organizar misas na súa honra.
