A negociación entre BNG e PSdeG presumíase doada en Lugo e así está sendo. Unha vez rematado o primeiro encontro oficial entre os responsábeis de ambas as formacións, nacionalistas e socialistas confirmaron a formalización dun acordo, que deseña unha estrutura de goberno semellante á operativa nestes catro anos. Así as cousas, os primeiros encargaranse das áreas de infraestruturas e mobilidade, cultura, educación mercados e atención cidadá. Pola súa parte, os segundos continuarán á fronte de economía, persoal, medio ambiente, urbanismo, servizos sociais, igualdade, deporte e rural.
Os equipos negociadores dos nacionalistas e dos socialistas destacaron ao remate da súa reunión de onte a coincidencia programática. A este respecto, explicaron que os seus obxectivos para este vindeiro mandato pasan por seguir avanzando na transformación física e económica da cidade, para lograr un Lugo máis cómodo, seguro e competitivo, e reforzar a estrutura interna do Concello, para que este sexa máis eficaz e redunde nun mellor servizo á cidadanía. Neste sentido, non descartan a incorporación de persoal externo para labores executivos, na liña do estabelecido na Lei de grandes cidades.
O voceiro nacionalista, Ruben Arroxo, e a súa homóloga socialista, Lara Méndez, expresaron onte a súa satisfacción polos resultados da xuntanza. Nesta liña, Arroxo asegurou que “as negociacións entre BNG e PSOE para conformar un Goberno en Lugo van polo bo camiño" e salientou a "boa harmonía para chegar a un acordo que nos permita continuar a mellorar a cidade, seguindo o mandato da veciñanza que saíu das urnas o pasado 28 de maio”.
Compostela
Por outra parte, BNG e PSdeG remataron onte as súas conversas en Compostela emprazándose para unha seguinte xuntanza a comezos da semana seguinte. Un día despois de que Compostela Aberta expresase a súa disposición a facer parte do Goberno liderado por Goretti Sanmartín, nacionalistas e socialistas avanzaron en cuestións programáticas, mais sen resolver a incógnita sobre a incorporación dos socialistas ao Executivo da capital da Galiza. Neste sentido, Sanmartín apostou “por un Goberno amplo e estábel no que participe o PSdeG ademais de Compostela Aberta” e indicou que “a próxima semana saberemos a decisión dos socialistas sobre a súa participación no Goberno” local.
Pontevedra
Nacionalistas e socialistas reuníronse onte, tamén, en Pontevedra para explorar os termos dun Executivo de coalición entre as dúas forzas políticas. O equipo negociador dos primeiros está conformado por Raimundo González, Cesar Mosqueira e Eva Vilaverde, integrando o segundo Iván Ponte, Yoya Branco e Guillermo Meixón. Neste sentido, fontes do mesmo presentaron este primeiro encontro como unha toma de contacto co obxectivo de testar a posibilidade dun acordo.
A Coruña
BNG e PSdeG citáronse na Coruña para un segundo encontro após manter unha primeira xuntanza na xornada de onte. Ao comezo da mesma, a concelleira nacionalista Avia Veira indicou que “chegamos con todo o ánimo do mundo e a mente aberta. Temos o mandato da sociedade de dialogar. É unha primeira reunión e non será a única”. Asemade, o portavoz socialista na cidade, José Manuel Laxe, expresou a “vontade de abrir un espazo de diálogo co BNG, sabendo que hai unha maioría clara de esquerdas na cidade da Coruña".
Por outra parte, a negociación entre as forzas de esquerda chegaron a bo porto en Redondela. Após as reticencias iniciais da Agrupación de Electores de Redondela (AER) a apoiar un Goberno liderado pola socialista Digna Ribas, AER e PSdeG fecharon un acordo para facilitar a súa investidura. Neste caso, o pacto asinarase ante notario e suporá unha multa económica por valor de 100.000 euros no caso de incumprirse o pactado
Urxen un Goberno amplo en Compostela
O Ateneo de Santiago sumouse ao debate sobre a gobernabilidade da cidade e reclamou das distintas forzas políticas "o máis rápido acordo para dotar a cidade dun Goberno amplo, sólido e maioritario capaz de darlle un novo impulso á nosa Compostela como capital da Galiza, aberta ao conxunto de España e con proxección europea e internacional”. Neste sentido, o Ateneo de Santiago solicitou “xenerosidade dos grupos políticos para que poñan os intereses da cidade por riba dos propios das distintas forzas”.