A través de catro amplas liñas de acción desenvolverá Sermos Galiza S.A. o proxecto “Os reis e raíñas da Galiza. 1.000 anos dun reino de seu”, un dos 20 seleccionados pola área de Cultura da Deputación da Coruña, dirixida polo deputado Xurxo Couto, no concurso que ten como obxectivo a difusión e valorización dun período histórico aínda non o suficientemente coñecido para a meirande parte das galegas e galegas.
Precisamente, a área de Cultura do ente provincial, no marco do Certame "Fondo de proxectos culturais Reino de Galicia 2021-22", busca contribuír a "combater a desmemoria e o esquecemento sobre o pasado medieval da Galiza", entendendo que a sociedade actual "precisa coñecer o seu pasado para comprenderse mellor" e para "poder pensarse con máis capacidade cara ao futuro".
Así, a iniciativa que levará a cabo Sermos Galiza S.A. nos próximos meses, da man dos investigadores Alexandre P. Vigo, Héitor Picallo e Xosé Ramón Ermida Meilán, permitirá afondar nas vidas e na actividade de máis de 40 monarcas galegos.
Coleccionábel
Unha das vías de traballo en preparación consiste nun coleccionábel de 34 fascículos centrados na difusión dos reis e raíñas do Reino de Galiza, que se publicará entre setembro e outubro canda o exemplar do xornal Nós Diario.
Afondarase nas figuras de Hermerico, Requila, Requiario, Frantán, Remismundo, Carriarico, Ariamiro, Teodomiro, Miro, Eborico, Andeca... até chegar a Afonso V e Xoana de Trastámara, nun interesante percorrido a través de mil anos.
Trinta e catro podcast
Ademais, emitiranse 34 podcast en relación aos contidos do coleccionábel, co fin de divulgalos a través da rede.
Unha acción enfocada especialmente á mocidade, ante a falta de información sobre o Reino da Galiza no currículo educativo actual.
Un Banco de Datos cun foro
O Banco de Datos sobre o Reino da Galiza en nosdiario.gal é outra das actuacións recollidas no proxecto. Trátase de ofrecer información complementaria das raíñas e reis, así como un foro de debate aberto onde as autoras e autores de cada unha das entregas da publicación coleccionábel poderán responder as dúbidas das persoas lectoras.
Entre os recursos que se poderán atopar destacan imaxes dos reis e raíñas, material cartográfico, escudos das dinastías reais e documentos históricos. Sermos Galiza S.A. pretende manter todo este banco de datos de maneira permanente na edición dixital de Nós Diario para contribuír á difusión do Reino da Galiza.
