Do 'caloret' de Rita aos 'pinganillos' de Feixoo

Rita Barberá foi unha política do PP de València de longa carreira: deputada nas Corts Valencianes (1983-2015); alcaldesa (1991-2015); senadora (desde 2015 até o seu falecemento o 23 de novembro de 2016 nunha habitación dun hotel de Madrid). Ademais estivo –como valenciana e veterana dirixente popular– implicada en varios delitos de lavado de capitais e tramas de corrupción: caso Taula e ao corrente doutros escándalos: Nóos, Gürtel, Emarsa, Ritaleaks... Porén, a súa sona fóra da Comunitat Valenciana débese a unha palabra: caloret, pronunciada no seu discurso na Crida 2015 (comezo das Fallas), no que esnaquizou o catalán: "Vos anime a que 'dejeim' [deixen] passar el fred del 'verano' [estiu], el fred de l'hivern i busquem [busquen] el caloret, el caloret faller, 'sin duda' [sense dubte] el caloret de foc i la flama". Rita Barberá, de 68 anos de idade, estaba ese día contenta de máis. Era o 'día grande' da súa Comunitat. Ademais ela era moi afeccionada ao drinking, como consta nun informe médico: "A Rita matouna o seu fígado". Tiña un grave problema hepático, unha cirrose de cabalo. Non faleceu, como intentaron xustificar os dirixentes do PP, polo estrés xerado polas acusacións de súa implicación no "pitufeo" (ingreso de 1.000 euros ao PP que o partido devolvía en dous billetes de 500 euros de procedencia ilícita). Casualidade ou non, despois da morte de Rita Barberá, houbo outra defunta: María José Alcón, muller de Alfonso Grau, número dous da alcaldesa, que fixo a décima vítima rara no PP de València. Un caso pendente de investigación. Aí o deixo, e volvamos ao rego do artigo. Valencià nas Corts Anos despois do caloret, no pasado mes de agosto xorde unha nova polémica coa lingua no Goberno de València. A consellería de Agricultura, Gandaría e Pesca que dirixe Vox reavivou o debate con un chío en valencià fóra de toda normativa lingüística elaborada pola Acadèmia Valenciana da Llengua (AVL). Proba de que de pouco serviron as campañas en prol da lingua. Nunha recente viaxe a Xàtiva, co gallo dunha exposición homenaxe a Raimon, collín nun bar un sobre de azucre cun lema, Fer-se vell és resignar-se a fer-se vell (La cosa no té altra explicació), editado polo centenario do escritor Joan Fuster (1922-1992). O pequeno envoltorio de papel, cunha caricatura ben feita do escritor pancatalanista nado en Sueca, aínda o gardo con coidado na billeteira. O vicepresidente primeiro e conselleiro de Cultura, o ex toureiro Vicente Barrera, tamén voxiano, dixo: "Eu non fago mensaxes en valencià, fágoas en español, haberá que preguntar a quen as faga". Mentres, o presidente da Comunitat Carlos Mazón recoñecía a autoridade científica da AVL e o bipartito do PP e Vox facían unha declaración en defensa do valencià, pero rexeitando o seu uso no Congreso que é a canle onde desexamos chegar. O galego no Congreso O deputado Néstor Rego (BNG) non volverá ser calado nin chamado á orde pola Presidencia do Congreso por falar en galego. A proposición de lei conxunta asinada polo BNG, PNV, EH Bildu, ERC, Sumar e PSOE o pasado 7 de setembro para modificar o Regulamento da Cámara cunha 'reforma exprés' permite –desde hoxe– usar as linguas oficiais do Estado español en todos os debates, así como na presentación de iniciativas parlamentarias. A reivindicación, pendente desde o primeiro día da constitución das Cortes, foi atendida agora pola nova presidenta do Congreso, Francina Armengol, na apertura da XV lexislatura o 17 de agosto. O cambio do que antes non podía ser e agora si ten unha explicación moi sinxela: a necesidade de Pedro Sánchez dos partidos soberanistas para gobernar. A autorización das tres linguas oficiais tamén irá ao Consello da Unión Europea deste 19 de setembro. Aínda vai ser posíbel ver a volta de Feixoo para con Rueda levar xuntos a faixa de Galicia Bilingüe Aquí a reforma foi aprobada o día 12 por unha resolución de Armengol. No debate de investidura (falida) de Alberto Núñez Feixoo previsto para o 26 e 27 de setembro poderá utilizarse o galego, o catalán e o euskera. Porén, Feixoo ten dito xa: "Son galego e falo as dúas linguas (galego e castelán), pero non concibo un Congreso con pinganillos". Feixoo, o que utilizou na campaña para as eleccións galegas de 2020, o lema "Galicia, Galicia, Galicia", mostra a súa verdadeira faciana. Xa o fixera durante anos na Xunta e cando marchou para Madrid a metade de mandato deixou na poltrona da Xunta o seu amigo Alfonso Rueda, que continúa a súa aposta contra o galego. Polo momento xa anunciou que pensa o mesmo que o seu xefe. E mentres, Aznar chama á 'rebelión cívica' a prol da "unidad de España" e o PP sen rumbo. Aínda vai ser posíbel ver a volta de Feixoo coa maleta, para con Rueda levar xuntos polas rúas de Compostela a faixa da cabeceira na manifestación de Galicia Bilingüe contra a "imposición del gallego".