O 17 de decembro deste ano está previsto que decorra en Chile a votación da segunda proposta para substituír a Carta Magna imposta pola ditadura de extrema dereita de Augusto Pinochet. Como a primeira, todo indica que será rexeitada, sostén un traballo demoscópico de Cadem divulgado na madrugada de hoxe pola axencia Prensa Latina.
51% das persoas que participaron na sondaxe sostiveron que votarán en contra, 34% a favor e até 15% non definiu a súa posición ou preferiu non contestar. Noutra enquisa publicada poucas horas antes, a de Pulso Ciudadano, inclúese unha estimación que afirma que 69,7% da poboación votaría en contra de desenvolverse hoxe o plebiscito, mentres que 30,3% das chilenas e chilenos estarían a favor.
Extrema dereita e conservadores
A proposta constitucional foi elaborada entre a extrema dereita do Partido Republicano e os conservadores de Chile Imos, que obtiveron a maioría no Consello Constitucional nas eleccións de maio deste ano.
De ser aprobada, acabaría co dereito ao aborto no país -que xa está limitado a tres causas: Perigo para a vida da nai, inviabilidade do embarazo ou violación- ou coa paridade de xénero no lexislativo.
Veto ás greves
Tamén prohibe as folgas de traballadoras e traballadores públicos ou de sectores estratéxicos, veta a negociación colectiva e consolida as empresas privadas como o epicentro do sistema de saúde e pensións, á vez que limita o papel dos sindicatos.
Outro dos aspectos máis criticados polos movementos sociais e forzas progresistas é o apartado orientado a que persoas condenadas por violacións dos dereitos humanos na ditadura poidan acceder á reclusión domiciliaria.