71% da poboación peruana rexeita a xestión da presidenta Dina Boluarte -que accedeu ao cargo tras a destitución do anterior mandatario, Pedro Castillo- segundo unha enquisa do Instituto de Estudos Peruanos (IEP).
O estudo do IEP revela tamén que 58% das persoas consultadas cre que houbo excesos por parte das forzas de seguridade na represión das protestas fronte a 26% que considera que actuaron adecuadamente.
A enquisa outorga igualmente mala nota para o Congreso, que ten unha desaprobación de 88%, oito puntos máis que hai un mes, mentres que as persoas que teñen unha visión positiva da Cámara peruana fican en 9%, informou o diario La República.
Con respecto ás mobilizacións, 60% da poboación peruana considera que están xustificadas as protestas -72% entre a mocidade-, mentres que 35% considera que non teñen xustificación. Ademais, 50% séntese identificado coas protestas. Porén, 46% contesta que non.
Por outra parte, 44% cre que os actores máis importantes das mobilizacións son os grupos de cidadáns espontáneos ou organizados. Con todo, 27% atribúe as protestas a colectivos violentos ou vinculados a grupos terroristas.
Finalmente, 66% desaproba as actuacións de Castillo que levaron á súa destitución, mentres que 30% si as aproba. O estudo baséase en entrevistas realizadas entre o 7 e o 12 de xaneiro e ten unha marxe de erro de 2,8 puntos porcentuais por encima e debaixo de cada resultado.
Un segundo estudo publicado este domingo, 15 de xaneiro, e elaborado por IPSOS Perú en exclusiva para Perú21 apunta que 52% da poboación peruana cre que deben adiantarse as eleccións a decembro deste ano, mesmo se iso significa que se aproben poucas reformas políticas.
O estudo demoscópico confirma a desaprobación de 71% para Boluarte. Tamén é rexeitada a xestión do primeiro ministro, Alberto Otárola, (61%) e do presidente do Congreso, José Williams (62%).
Con respecto ás reformas políticas, 57% defende que a elección do presidente e o Congreso sexan cada catro anos fronte aos cinco anos actuais, mentres que a opción de continuar con este sistema é apoiada por 40% da poboación do Perú.
O Goberno peruano amplia o estado de emerxencia
Este domingo entrou en vigor a extensión do estado de emerxencia decretado polo Goberno do Perú, afectando novos territorios nos que se incrementaron as protestas nas últimas semanas. "A Policía Nacional do Perú mantén o control da orde interna, co apoio das Forzas Armadas”, sinala o decreto.
Así, a lei marcial rexerá nos departamentos de Lima (capital do Estado peruano), Cusco e Puno; nas provincias de Callao, Andahuaylas, Tambopata e Tahuamanu, así como no distrito de Torata. Por outra parte, a norma tamén estendeu por termo de dez días o toque de queda no departamento de Puno, desde as 20 até as 4 horas.
A medida tamén incluíu cinco estradas estatais, a Panamericana Sur, a Panamericana Norte, a Central, o Corredor Viario Sur Apurímac-Cuzco-Arequipa e o Corredor Vial Interoceánico Sur.
A extensión do estado de emerxencia foi publicada na noite do sábado nunha edición extraordinaria do boletín oficial do Estado, 'O Peruano', e prolongarase durante os seguintes 30 días, até mediados de febreiro.
