O país veciño vén de facer públicos os datos do número de persoas inscritas no mes de xullo nos centros de emprego en Portugal. En total son 277.466 persoas, o que supón 1,8% menos que no mes de xuño e a cifra máis baixa desde 2003, ano no que o Instituto de Emprego e Formación Profesional (IEFP) de Portugal comezou a rexistrar estas cifras.
Nun informe difundido esta terza feira, o IEFP subliña que esta baixada das persoas desempregadas no mes de xullo forma parte dunha tendencia sostida no tempo. Así, o número de persoas inscritas nos centros de emprego lusos reduciuse en 24,7% nos últimos doce meses, desde xullo de 2021.
No informe, o IEFP detalla que, por grupo profesional, as persoas desempregadas con maior porcentaxe son os traballadores non cualificados (26,5%), os de "servizos persoais, de protección, seguridade e vendedores" (19,9%), o persoal administrativo (11,6%) e os especialistas de actividades intelectuais e científicas (11%).
"O desemprego diminuíu, fronte ao mes homólogo de 2021, en todos os grandes sectores: o agrícola (-13,7%), o secundario (-24,4%) e o terciario (-25,4%)", subliña o organismo portugués de emprego.
Perto do pleno emprego
Con estes datos, a taxa de desemprego de Portugal situouse en 5,7% no segundo trimestre de 2022, segundo os datos publicados polo Instituto Nacional de Estatística (INE) luso. Esta cifra é a máis baixa no país desde os últimos once anos, xunto co obtido tamén en 2020, antes da pandemia.
Esa porcentaxe de 5,7% sitúa Portugal no limiar do pleno emprego. Neste sentido, os economistas consideran que un Estado se atopa nesta situación cando a súa taxa de desemprego oscila entre 3% e 5%.
Despois de alcanzar o seu máximo histórico no ano 2012, cando 900.000 persoas estaban inscritas nos centros de emprego, 17,5% da poboación activa en Portugal nese momento, a poboación lusa atópase agora na situación totalmente oposta, con varios territorios e zonas do norte do país nas que xa se acadou ese pleno emprego.
