“Se os motivos de seguridade nacional poden ser usados para a supresión arbitraria de empresas destacadas doutros países, entón non hai equidade nin xustiza en absoluto”, a medida estadounidense é “contraria ao principio de competencia leal”, ás “normas de comercio internacional” e segue unha “lóxica de gánster” para apropiarse do que non é seu, subliñou a quinta feira o voceiro do Ministerio de Relacións Exteriores da China, Wang Wenbin.
Poucas horas antes, a Cámara de Representantes de Washington aprobara un proxecto dirixido na práctica contra a aplicación TikTok, que se o Senado o referenda obrigaría ByteDance, a compañía chinesa detrás da rede social, a vender en seis meses TikTok a unha sociedade estadounidense ou dun país aliado, ou afrontar a súa prohibición en todo o país.
Biden apoia a norma
O Executivo dos Estados Unidos ratificou que promulgará a norma se supera o trámite na Cámara Alta, incidindo en que se trata dunha lexislación necesaria.
O certo é que “a extensión da espionaxe e manipulación que TikTok realiza é igual á de Facebook”, resolveu Bruce Schneier, docente de ciberseguridade na Universidade de Harvard, pero, a diferenza da maioría de redes sociais nos países occidentais, non é estadounidense.
Ataque ás pequenas empresas e ás persoas creadoras de contido
Shou Zi Chew, director executivo de TikTok, demandou ás usuarias que “fagan ouvir as súas voces”, advertindo que a prohibición busca beneficiar “outras empresas de redes sociais” e “sacará miles de millóns de dólares dos petos de creadores e pequenas empresas”, así como “porá en risco máis de 300.000 postos de traballo estadounidenses”.
170 millóns de persoas e 7 millóns de empresas usan a aplicación no lugar.
