Sameh Shoukry, ministro de Relacións Exteriores exipcio, trasladou a segunda feira que “temos esperanzas” na última proposta para un alto o fogo na Faixa de Gaza, unha proposición que “tivo en conta as posicións de ambas as partes e tratou de xerar moderación”.
A volta do réxime de apartheid israelí á mesa de negociacións, no marco da presión dos seus aliados, traduciuse nunha rebaixa das súas exixencias á hora de que a primeira fase da tregua incluíse a liberación de 40 persoas israelís detidas no enclave desde a operación da resistencia palestina de outubro.
Ao tempo, o secretario de Estado estadounidense, Antony Blinken, apuntou que o pacto “potencialmente está moi perto de completarse”, cun texto que recolle un período de “calma sostida” nunha segunda fase. Horas antes, a organización palestina Hamás, que goberna Gaza, comunicou que non detectou “grandes problemas” na última proposta.
Como mínimo 34.488 palestinas e palestinos foron asasinados na agresión militar israelí a Gaza desde outubro, que deixou case 78.000 persoas feridas.
