Tik Tok

O caso Tik Tok vai gañando dimensión cada día que pasa. Non serviu de moito para calmar os ánimos a comparecencia do seu director executivo, Shou Zi Chew, ante o Congreso dos EUA o pasado 23 de marzo. Era de esperar. En febreiro, a Casa Branca ordenou ás axencias federais desinstalar a aplicación de todos os dispositivos dos seus funcionarios. As restricións afectan xa tamén a países como Canadá, Reino Unido, Taiwán, Nova Zelandia… con fortes afinidades "de valores" entre eles. Tamén a Unión Europea está seguindo esa estela. Vén de sumarse Australia, cunha decisión alentada polas axencias de intelixencia e seguridade. No Capitolio, algúns senadores reclaman a prohibición total da aplicación. Seguridade e protección Hai tres aspectos a considerar. O primeiro ten que ver coa privacidade, a seguridade dos datos e os contidos. Indubidablemente, hai moita marxe para a mellora nestes aspectos, especialmente na protección dos menores. O risco sempre existe. E por complexo que pareza, habería que adoptar unha regulamentación adecuada, non só neste caso, tamén pensando en Twitter, Facebook ou Instagram, redes das que non parece haber tanta preocupación porque son empresas estadounidenses, aínda que si está demostrado nestes casos a súa capacidade de influencia, por exemplo, nos resultados dunhas eleccións. Pero igualmente recollen datos e difunden historias e contidos, e espían. En calquera caso, a apropiación indebida de datos confidenciais debera ter unha resposta dos poderes públicos, necesariamente protectora de cara aos cidadáns. O segundo é a ansiedade que provoca en Washington o éxito empresarial dunha fórmula chinesa. Pasou con Huawei antes. Cabería pensar se este trato dispensado a Tik Tok é comparable co dado a Facebook ou Cambridge Analytica. E xa pasou antes con outras empresas. É paradigmático o caso da francesa Alstom, rival de General Electric, que acabou nas súas mans para evitar unha fusión con Shanghai Electric Company. O affaire foi de libro e aplicado de forma moi semellante no exemplo de Huawei, incluíndo a detención da directora financeira, Meng Wanzhou, como no caso de Alstom pasou con Frederic Pierucci. Beijing non é París e a batalla continúa por ambas as dúas partes. Biden sopesa máis restricións contra Huawei. O terceiro ten que ver coa seguridade nacional e a posibilidade de usar estas aplicacións para realizar operacións hostís. Os EUA non aportan probas, como tampouco fixeron no caso de Huawei. A seguridade é un caixón de xastre onde colle todo. Non obstante, non parece que aquí tampouco China vaia achantar. Polo pronto, suponse que en resposta lanzou unha investigación destinada a auditar o maior fabricante de chips de memoria dos Estados Unidos. O seu propósito é "salvagardar a seguridade da información esencial sobre a infraestrutura da súa cadea de subministración e previr posibles riscos de seguridade provocados por produtos problemáticos". Sen dicilo coa arrogancia explícita estadounidense, China está moi claramente acusando o fabricante estadounidense de chips de memoria Micron Technology cun argumento moi parecido ao que os EUA esgrimiron contra Huawei e outras empresas chinesas nos últimos catro anos. Rivalidade xeopolítica Esa rivalidade estratéxica entre os dous xigantes ten implicacións para terceiros, como ben sabemos. No eido destas tecnoloxías, tampouco quedan sen resposta as presións que os EUA realizan sobre países terceiros como Xapón ou Holanda, para limitar os seus negocios con Beijing. E os próximos en caer poderían ser os fabricantes de chips de Corea do Sur e Xapón. Nos últimos días houbo contactos ao máximo nivel entre as diplomacias dos tres países e pediuse prudencia. Só no caso de Xapón, China representa unha cuarta parte das exportacións de equipo para chips. O de Micron Technology é tamén unha chamada de atención para os países asiáticos que aliñaron os seus intereses cos dos Estados Unidos. Non sería de estrañar que Samsung e SK Hynix de Corea do Sur tamén sexan obxecto de escrutinio nas próximas semanas. Nesta rivalidade xeopolítica polo dominio dos compoñentes esenciais da produción da alta tecnoloxía todos buscan pretextos. Os EUA reprimen as industrias de terceiros que afectan ao seu liderado industrial e tecnolóxico. Pero China non é un Xapón grande e córrese o risco de estimular a determinación de se tornar máis autosuficiente. Agora mesmo impulsa unha forte reordenación do sector coa premisa de primar o avance tecnolóxico a maior ritmo, inda que sexa a costa dos beneficios empresariais a corto prazo do sector privado ou do desmedido –e desorientado– crecemento das empresas do sector. A xulgar polo acontecido con Huawei, as perspectivas de Tik Tok non son alentadoras. Pero ese castigo pode acabar sendo un estímulo máis para China.