Os axentes policiais de Nova York, nos Estados Unidos, están “preparados para responder” as protestas previstas para esta terza feira na cidade pola entrega do presidente entre 2017 e 2021, Donald Trump, salientou a segunda feira o Departamento de Policía municipal.
O ex mandatario foi imputado a semana pasada por varios cargos de falsificación de rexistros comerciais, adianta a prensa estadounidense, na investigación polo pago de 120.000 euros á actriz pornográfica Stormy Daniels para presuntamente comprar o seu silencio no que atinxe a unha relación entre ambos cando Trump xa estaba casado. Así e todo, os cargos penais concretos polos que se lle acusa non serán difundidos até que lle sexan lidos a Trump despois do seu arresto.
A membro republicana da Cámara de Representantes, Marjorie Taylor Greene, replicou o chamamento a protestar feito polo propio Trump, perante o que a Policía de Nova York erixiu barricadas ao longo da fin de semana na contorna da Torre Trump e do edificio do Tribunal Penal de Manhattan.
Unión republicana
Asemade, grupos de seguidores aplaudiron esta segunda feira o ex presidente cando se dirixía ao aeroporto desde a súa residencia no Estado de Florida, despois de que a imputación levara a un dividido Partido Republicano a fechar filas con Trump, algo que tamén se reflicte no aumento dos apoios na formación de cara ás primarias para escoller o candidato republicano nas presidenciais de 2024, corroborou Reuters.
Pola súa parte, Trump agradeceu o “tremendo apoio” por parte dos seus partidarios e considerou que a imputación é un “asalto contra o país” e a proba de que “estamos a vivir nun país terceiromundista”, defendendo que “os matóns da esquerda radical e os insurrectos apropiáronse del e o están a destruír”.
Aliás, tras incidir en que a acusación é un intento de inxerencia nas primarias, cuestionou o xuíz Juan Merchan, que está previsto que presida a comparecencia, por dirixir un xuízo en 2022 no que a empresa inmobiliaria do ex presidente foi condenada por fraude fiscal.
Amais deste caso, Trump é o centro de distintas investigacións que o poderían levar a enfrontar cargos máis graves que a falsificación de rexistros comerciais, como quedar con documentos confidenciais de alto secreto do ámbito nuclear ao final da súa Presidencia ou intentar impedir a proclamación de Joe Biden como presidente alegando fraude nos comicios, no que se enmarca o asalto ao Capitolio, que para o Congreso foi un "intento de golpe de Estado".