Trump entregarase á Xustiza dos Estados Unidos a terza feira

Susan Necheles e Joseph Tacopina, do equipo legal do ex presidente estadounidense Donald Trump, apuntaron a sexta feira que están a coordinar coa Fiscalía de Manhattan, en Nova York, a súa entrega voluntaria á Xustiza de cara á terza feira da próxima semana. O mandatario entre 2017 e 2021 dos Estados Unidos foi imputado por un xurado a quinta feira (madrugada da quinta á sexta feira na Galiza) por cargos penais vinculados a unha presunta falsificación de información dos seus negocios por non declarar axeitadamente un pago de 120.000 euros á actriz pornográfica Stormy Daniels, que sostén que se efectuou para comprar o seu silencio por unha relación sentimental con Trump, durante a campaña electoral que o levou á Presidencia. Malia que non sería o primeiro líder ou ex líder do país arrestado -en 1872 o presidente Ulysses S. Grant foi detido por exceso de velocidade na súa carruaxe de cabalos pero non acusado-, Trump é o primeiro que é imputado e ten que enfrontar cargos penais, no que el considera unha “persecución política e interferencia electoral ao nivel máis alto da historia”, en alusión á súa candidatura ás presidenciais de 2024. Polo de agora, Tacopina explicou á NBC arredor da entrega ás autoridades que “estamos a traballar nesa loxística neste momento”, insistindo en que “non hai delito” como para que Trump valore declararse culpábel, á vez que sinalou que non se “agochará en Mar-a-Lago”, a súa residencia no Estado de Florida. Dúas fontes que non quixeron ser identificadas trasladaron a AP que se lle pediu ao ex presidente que se entregase onte, mais o seu equipo legal contestou que o Servizo Secreto -encargado da protección dos antigos mandatarios- precisaba máis tempo para desenvolver os preparativos de seguridade. Este aspecto é especialmente relevante polas protestas agardadas contra a súa imputación. O 18 de marzo, Trump fixo un chamamento aos seus partidarios a manifestarse adiantando que sería arrestado o 21. Nese sentido, a Policía neoiorquina mantivo sobre aviso a sexta feira 36.000 axentes para garantir a seguridade na contorna dos xulgados. Ao mediodía da terza feira, unha vez que chegue a Nova York e se entregue á Xustiza, as autoridades tomarán as impresións dixitais das mans de Trump e faranlle unha foto para os arquivos da Policía, antes de ser procesado e agardar para escoitar os cargos penais dos que está acusado, que aínda non foron feitos públicos. O ex fiscal de Manhattan Jeremy Saland incidiu en que é un caso “atípico único”, e mais tendo en conta que malia estar retido até que lle sexan lidas as acusacións terá en todo momento á súa beira os axentes do Servizo Secreto, e avanza que será un proceso rápido no que Trump será liberado sen fianza, algo común no Estado de Nova York. Aliás, fixarase a data para as vistas preliminares antes do xuízo. Repercusión política A acusación contra Trump uniu rapidamente un Partido Republicano que sufría unha división máxima desde as eleccións intermedias de 2022, cando obtiveron un resultado por baixo das expectativas pero alcanzaron o control da Cámara de Representantes, e que levou a que o líder republicano no órgano, Kevin McCarthy, precisara 15 votacións para convencer as e os representantes republicanos de que lle brindaran o seu apoio para dirixir a Cámara. McCarthy cargou despois de coñecerse a noticia contra o fiscal detrás da acusación, o demócrata Alvin Bragg, salientando que “mentres libera habitualmente criminais violentos que aterrorizan o público utilizou o noso sagrado sistema de Xustiza como arma contra o presidente Trump”, antes de aseverar que a Cámara “pedirá contas a Bragg e ao seu abuso de poder sen precedentes” e acusalo de “interferir” nos comicios. Ao tempo, o principal rival de Trump nas primarias republicanas para definir un candidato á Presidencia, o gobernador de Florida Ron DeSantis, indicou que non colaborará cunha potencial petición de extradición do Estado de Nova York, cualificando a acusación de “anti estadounidense”. No que atinxe ás primarias, a última enquisa de Ipsos coloca en cabeza a Trump con 43% dos apoios no seo dos republicanos, por un 31% de DeSantis. A lei dos Estados Unidos non impide que Trump poida presentarse ás eleccións aínda sendo condenado ou até que goberne desde prisión, aínda así, é inevitábel que o xuízo teña impacto no devir dos comicios e mesmo acabar beneficiando a Trump, subliñou o profesor da Universidade de Princeton Julian Zelizer. “Un dos maiores talentos de Trump é sacar partido dos ataques contra el”, resolveu. O certo é que nas últimas dúas semanas Trump xa recadou arredor de dous millóns de euros para sufragar os gastos da súa defensa legal. Pola contra, a mensaxe máis repetida no Partido Demócrata para tratar a imputación de Trump é que “ninguén está por riba da lei”. En todo caso, e tras o intento de golpe de Estado no Capitolio a comezos de 2021 que profundou a fenda entre demócratas e republicanos ao longo do país, esta imputación supón entrar en “territorio descoñecido”, debulla Reuters, ou “pór a proba a democracia”, recalca The New York Times, con temores de fondo dunha nova explosión de violencia. Máis de 30 cargos penais por fraude comercial O ex avogado de Trump, Michael Cohen, testemuñou en 2018 que Trump lle ordenou pagar a Daniels poucos días antes das eleccións de 2016, resultando condenado por, entre outros delitos, infrinxir as leis que regulan as campañas electorais con ese pago. O propio Trump admitiu que reembolsou o diñeiro a Cohen -o que non é ilegal- e negou un romance coa actriz ou irregularidades na campaña. Mentres, Daniels afirma que aceptou os cartos polas preocupacións no ámbito da seguridade da súa familia após ser ameazada para que “deixase a Trump en paz”. Arredor desa cuestión, a CNN informou de que se lle imputarán a Trump máis de 30 cargos vencellados coa fraude comercial, pois rexistrou os 120.000 euros como un gasto de negocios, constituíndo unha presunta falsificación da información relativa aos negocios, algo considerado ilegal no Estado de Nova York. Casos pendentes Ademais do caso no que foi acusado, Trump está sendo investigado en distintos Estados estadounidenses por non devolver ao final do seu mandato documentos confidenciais de alto secreto, tratar de evitar que fora recoñecida a vitoria electoral do presidente actual Joe Biden ou interferir nas eleccións en Xeorxia en 2020.