A UE insta os Estados a prohibir a pesca de arrastre en 20% das augas mariñas en 2024

A Comisión Europea instou esta terza feira os Estados da Unión Europea (UE) a prohibir a pesca de arrastre en polo menos 20% das augas mariñas de cada un deles para marzo de 2024 a fin de garantir a eliminación gradual deste método en todas as zonas mariñas protexidas para 2030, ademais de non permitilo nas de nova creación. Así o confirmou en rolda de prensa o comisario europeo de Medio Ambiente, Océanos e Pesca, Virginijus Sinkevicius, quen explicou que estas accións pretenden "restaurar os ecosistemas mariños e reducir o impacto das actividades pesqueiras no medio ambiente mariño". Rexeitamento do sector Na súa comunicación, Bruxelas define a pesca de arrastre como "unha das actividades máis estendidas e prexudiciais para os fondos mariños e o medio ambiente", o que suscitou as críticas do sector, entre elas, as de organizacións como Europeche [que agrupa máis de 45.000 buques da UE e con representación galega] ou a Alianza Europea de Pesca de Fondo [que agrupa 22.000 pescadores e 8.000 barcos pesqueiros de 14 Estados da UE e está presidida polo galego Iván López], que rexeitan o obxectivo de Bruxelas de eliminar esta arte pesqueira. "Converter o mar nun santuario ten un importante custo ambiental", afirma Europeche "Debemos tentar facer compatíbel a protección do medio ambiente coa actividade humana e, en particular, coa tan necesaria produción de alimentos. Tentar converter os nosos mares en santuarios mariños custaría ao mundo moito máis en deforestación e perda de biodiversidade que pola pesca", afirma a agrupación pesqueira Europeche. O presidente da Federación Estatal das Confrarías de Pescadores e patrón maior de Burela, Basilio Otero, critica como "irreal" a intención da Comisión Europea de eliminar en marzo de 2024 a pesca de arrastre en 20% das augas de cada Estado da UE. "Non se pode tomar a un ano vista decisións desa índole" e "sen ter en conta a opinión dos pescadores", quéixase. O representante das confrarías subliñou que a prohibición do arrastre implica "un incremento das importacións, que curiosamente non coidan o que eles pretenden coidar: medio ambiente, sostibilidade e aspectos sociais que na UE están arraigados". A Cooperativa de Armadores de Pesca do Porto de Vigo (ARVI) censura a planificación da Dirección Xeral de Asuntos Marítimos e Pesca da Comisión Europea para "suprimir a actividade do arrastre". Sabendo ademais, "que abocará a perder o abastecemento procedente de 7.000 barcos comunitarios que achegan 25% da produción propia da UE", afirma ARVI. Catro documentos Este paquete de políticas marítimas inclúe catro documentos: unha avaliación da Política Pesqueira Común, unha avaliación da organización común de mercados dos produtos da pesca e a acuicultura, un plan de acción para protexer e restaurar os ecosistemas mariños para unha pesca sostíbel e resistente e unha estratexia para a transición enerxética do sector pesqueiro. Acorde ao texto do plan, para finais de marzo de 2024, os Estados deberán adoptar medidas estatais ou ben presentar recomendacións conxuntas para eliminar progresivamente a pesca de arrastre en todas as zonas protexidas existentes e non permitila nas de nova creación, a fin de alcanzar o obxectivo da Comisión Europea de eliminar este método nestas zonas para 2030. De forma paralela á adopción de medidas e presentación de recomendacións, Bruxelas espera que os Estados preparen e publiquen follas de ruta nas que describan as medidas que teñen previsto adoptar para aplicar o plan de acción de cara ao veto. A planificación debe incluír detalles sobre a identificación das zonas nas que debe prohibirse a pesca de arrastre, tendo en conta os compromisos dos Estados da UE de crear novas zonas mariñas protexidas de cara ao ano 2030, así como detalles sobre as frotas afectadas por esta medida. Ademais, para mediados de 2023, os Estados da UE deberán finalizar o límite para a extensión máxima admisíbel de leito mariño que pode perderse ou verse afectada negativamente pola presión humana e terán que adoptar "sen demora" medidas estatais ou, no seu caso, presentar recomendacións conxuntas para aplicar estes limiares. Ribeira, Celeiro e Vigo O de Ribeira está considerado o porto de baixura máis importante do Estado español, polo que o veto progresivo á pesca de arrastre de cara ao ano 2030 terá unha influencia moi negativa sobre a actividade económica do municipio da comarca do Barbanza. De feito, na actualidade teñen base neste porto máis de 250 embarcacións de arrastre, cerco, palangre e artes menores. Ribeira ten o porto de baixura máis importante do Estado español Outras das principais afectacións serán sobre os portos de Celeiro [no municipio de Viveiro] e Vigo. Tan só Vigo e as comarcas do Barbanza e O Salnés concentran máis da metade da actividade produtiva do sector da pesca na Galiza. Ribeira xera 16% da actividade do sector na Galiza, mentres que Vigo representa 12,1% do total. Celeiro, con máis de 90 buques rexistrados, tamén ten grande dependencia da pesca de arrastre. Consecuencias ambientais da prohibición de Bruxelas O profesor da Universidade de Santiago de Compostela (USC) e especialista en economía pesqueira Gonzalo Rodríguez, en declaracións a Nós Diario, sinala que "aínda que hai buscar a forma de protexer os fondos, incluídos os mariños, o que acontece é que o volume de produtos alimentarios que precisamos segue sendo o mesmo, saquémolos do mar ou da terra, e se os sacamos todos da agricultura e da gandaría, o impacto que xeran é moito máis elevado que o da actividade pesqueira, entón estamos enfocando este problema dun modo parcial e, en realidade, moi neoliberal". "Non contamos cunha alternativa real á pesca" "Ou pescamos, que se pode facer de forma sostíbel, ou deforestamos selvas e plantamos soia para a agricultura e a gandaría", afirma o economista especializado na actividade pesqueira. "Deixando de lado os problemas ambientais, nos países que están especializados en pesca, como é o caso da Galiza, zonas como Celeiro, Ribeira ou Vigo, onde hai un peso moi elevado do arrastre, van sufrir as consecuencias desta decisión de Bruxelas", engade o profesor da USC. "Non existe alternativa real de non comer o peixe que consumimos, a non ser que sexamos desas persoas que pensan que a comida medra nos supermercados", conclúe Gonzalo Rodríguez.