O prezo medio da luz para a clientela de tarifa regulada vinculada ao mercado maiorista cae este domingo 20% con respecto a este sábado, até os 112,75 euros por megawatt hora (MWh), segundo os datos provisionais do Operador do Mercado Ibérico de Enerxía (OMIE).
Na poxa, o prezo medio da luz no mercado maiorista (o denominado pool) sitúase este domingo en 113,48 euros/MWh. O prezo máximo rexistrarase entre as 18 e as 19 horas, con 155,61 euros/MWh, mentres que o mínimo para a xornada, de 90,93 euros/MWh, dáse entre as 10 e as 11 horas.
A este prezo do pool súmase a compensación ás gasistas, que nesta ocasión é lixeiramente negativa, -0,73 euros/MWh, e que ten que ser abonada polos consumidores beneficiarios da medida, os consumidores da tarifa regulada (PVPC) ou os que, a pesar de estar no mercado libre, teñen unha tarifa indexada ou teñen que renovar o seu contrato.
A 'excepción Ibérica'
En ausencia do mecanismo da 'excepción ibérica' para topar o prezo do gas para a xeración de electricidade, o prezo da electricidade no Estado sería de media uns 121,24 euros/MWh, o que supón uns 8,5 euros/MWh máis que coa compensación para os clientes da tarifa regulada, que pagarán así un 7% menos de media.
O 'mecanismo ibérico', que entrou en vigor o pasado 15 de xuño, limita o prezo do gas para a xeración eléctrica a unha media de 48,8 euros por MWh durante un período de doce meses, cubrindo así o próximo inverno, período no cal os prezos da enerxía son máis caros.
O gas natural
En concreto, a 'excepción ibérica' fixa unha senda para o gas natural para xeración de electricidade desde un prezo de 40 euros/MWh nos seis meses iniciais (até o 15 de decembro), e posteriormente, un incremento mensual de cinco euros/MWh até a finalización da medida.
