O Executivo español elevará 8% o salario mínimo para situalo na cifra de 1.080 euros

Despois da reunión mantida nesta terza feira entre a ministra española de Traballo, Yolanda Díaz, e os secretarios xerais de CCOO e UXT, Unai Sordo e Pepe Álvarez, o presidente do Goberno do Estado español, Pedro Sánchez, anunciou desde o atril do Senado que o Executivo aprobará unha suba do Salario Mínimo Interprofesional (SMI) de 8% para situalo en 1.080 euros -en 14 pagas- en 2023. O Goberno español retomará en xaneiro a negociación sobre o Salario Mínimo Interprofesional Sánchez avanzou na súa primeira comparecencia do ano na Cámara Alta esta nova suba do SMI, que se aplicará con efectos retroactivos, co obxectivo, dixo, de situalo en 60% do salario medio do Estado español. Porén, segundo o Ministerio de Facenda, o salario medio anual no Estado sitúase en 28.301 euros, polo que para que o salario mínimo alcance a taxa de 60% do salario medio que recomenda a Carta Social Europea -tratado do Consello de Europa sobre dereitos humanos asinado polo Estado español-, debería chegar a 1.212 euros mensuais. A suba salarial, non obstante, fica lonxe do aumento do custo de determinados produtos, como os alimentarios, que encareceron 15,7% durante o pasado ano. "A nosa loita por mellorar as condicións dos traballadores e por lograr unha repartición máis xusta dos beneficios empresariais non fixo máis que empezar", afirmou Sánchez despois do seu anuncio no Senado. O mandatario advertiu de que o propósito do Goberno estatal non se limita só a demandar ás empresas unha repartición máis xusta dos beneficios, senón que tamén as compañías xeren máis riqueza e que esa riqueza "non quede nas alturas, nos de arriba". "Se os salarios das clases medias e tamén das clases traballadoras non subiron todo o que deberían ao longo desta década é tamén resultado dun modelo económico que se impuxo entón, baseado en competir en custos e en atraer empresas porque aquí pagabamos salarios máis baixos respecto ao resto de Europa", sinalou o presidente español. Neste punto, culpou a política e o sector privado da perda de poder adquisitivo das traballadoras e traballadores, criticando que as empresas aumenten beneficios, paguen bonus millonarios aos seus directivos e "non suban un céntimo" ao seu persoal. "Eu pregúntome se esta situación é xusta", sinalou tras cuestionarse por que unha empresa que gaña 600 millóns de euros destina parte desa ganancia só a uns poucos, como o conselleiro delegado, os consellos de administración ou o director financeiro e "non aos dependentes, administrativos ou repoñedores". "Non teñen tamén mérito nese éxito empresarial? Eu creo que si", indicou Sánchez. O líder do Goberno estatal puxo en valor que o español é, dixo, o segundo Estado da Organización para a Cooperación e Desenvolvemento Económico (OCDE) que máis aumentou o SMI, alzándoo 36% desde o inicio de mandato do actual Executivo. Así mesmo, lembrou que cando el chegou á Presidencia, o salario mínimo era de 735 euros, cando agora é de 1.000 euros. O presidente español cargou contra a "promesa" da dereita de baixar impostos e a súa negativa a medidas como a 'excepción ibérica', para posteriormente preguntarlle ao líder do PP, Alberto Núñez Feixóo, que interese defende cando Gobernos autonómicos que lidera o seu partido presentan recursos de inconstitucionalidade ao imposto temporal ás grandes fortunas. Díaz dá por cumprido un compromiso da lexislatura A pesar do cálculo do salario medio por parte de Facenda, o Goberno español considera, baseándose nos datos do seu propio consello de expertos, que o salario mínimo alcanza con este anuncio 60% do salario medio. O salario mínimo en Francia ascende até os 1.645 euros Así, Díaz, resaltou que "grazas ao acordo cos sindicatos faise efectivo un dos grandes compromisos da lexislatura: que o SMI alcance polo menos 60% do salario medio -estatal-". "Un día moi importante para as traballadoras e traballadores do noso país: subiremos o salario mínimo a 1.080 euros, un 8%, en 2023", publicou no seu perfil na rede social Twitter. Os expertos que asesoran o Goberno estatal recomendaban elevar o SMI entre 4,6% e 8,2% para 2023, ao obxecto de situar esta renda mínima entre 1.046 e 1.082 euros ao mes. Pola súa parte, CCOO pedía que o SMI se situase entre 1.082 e 1.100 euros e UXT quería levalo directamente até os 1.100 euros mensuais. Díaz mostrouse partidaria de situalo no limiar alto da recomendación, nunha cantidade de 1.082 euros, así como de acometer unha revisión ao longo do ano se fose necesario. Máis baixa era a proposta da Confederación Española de Organizacións Empresariais (CEOE), consistente nunha alza do SMI de 4% para 2023, até os 1.040 euros brutos mensuais. Unha posición que foi cualificada pola portavoz do grupo popular, Cuca Gamarra, de "absolutamente lexítima". A CEOE non acode á reunión co Executivo A patronal española negouse esta terza feira a participar na reunión co Executivo estatal e os sindicatos CCOO e UXT para negociar a suba do SMI. A CEOE alegou que "non se daban as condicións" para que puidese asistir á reunión, porque, argumentou, o Goberno estatal nin realizou unha consulta cos axentes sociais no transcorrido do mes de xaneiro, nin realizou unha proposta formal, nin deu resposta á que fixo a patronal no seu día. A ceoe propuña deixar o salario mínimo en 1.040 euros mensuais O secretario de Estado de Emprego e Economía Social, Joaquín Pérez Rey, afirmou antes da reunión cos sindicatos CCOO e UXT que propiciou o acordo que "unha medida que afectará a millóns de persoas non pode ter unha patronal ausente, non pode ter unha patronal que non veña escoitar o que o Goberno ten que dicir". "É unha irresponsabilidade", concluíu Pérez. A CIG pide cumprir coa Carta Social Europea subindo o SMI a 1.212 euros O secretario de Emprego da CIG, Francisco González Sío, e o secretario xeral, Paulo Carril. (Foto: Nós Diario) A CIG reiterou esta terza feira a demanda dun incremento do Salario Mínimo Interprofesional (SMI) até situalo en 60% do salario medio, tal e como recomenda a Carta Social Europea. A central sindical nacionalista cifra esta contía en 1.212 euros, tendo en conta que o salario medio estatal é de 28.301 euros. A CIG exixe subir o SMI a 1.212 euros para equiparalo a 60% do salario medio Segundo explicou o secretario confederal de Emprego da CIG, Francisco González Sío, "o cálculo desta contía é o resultado do módulo salarial que realiza o Ministerio de Facenda do Estado español cruzando os ingresos das persoas traballadoras cos datos da Tesourería da Seguridade Social, e non como fai o grupo de expertos do Goberno estatal que emprega enquisas e non datos de ingresos reais”. A CIG solicita equiparar o SMI a 60% do salario medio estatal Para González Sío, equiparar o SMI á Carta Social Europea “significa quitar das rendas do capital cara as rendas do traballo e, polo tanto, mellorar as condicións de vida de decenas de miles de traballadoras e traballadores galegos”. O secretario confederal de Emprego da CIG subliñou ademais que está demostrado que subir o salario mínimo profesional non crea desemprego, senón que, polo contrario reactiva a economía. “Xa está ben, a adhesión á Carta Social Europea na súa versión máis actualizada non pode quedar nun simple acto simbólico. O Goberno español non a pode estar incumprindo sistematicamente”, reafirmou González Sío. Así, na mesma xornada na que sindicatos estatais -CCOO e UXT- e o Executivo español negociaron unha suba do SMI, a CIG reiterou que "a única contía admisíbel é a dos 1.212 euros -60% do salario medio estatal-".