As confrarías de pescadores e organizacións de produtores pesqueiros opóñense á instalación de parques eólicos na zona do Cantábrico Noroeste, unha oposición que se puxo de manifesto tras unha nova reunión en Burela.
O presidente da Federación Nacional de Confrarías e presidente da de Burela, Basilio Otero, expresa a "preocupación" do sector ante a "presenza" deses muíños que se instalarían "sen ter en conta a pesca".
Otero asegura que o sector xa está "a dialogar co Goberno galego". Con todo, alerta de que "hai empresas a nivel estatal que van polo seu lado", algo que, avanza, desde o sector "non" o van permitir.
Segundo as previsións dos Planos de Ordenación do Parque Marítimo, explica Otero, "hai cinco zonas e Iberdrola xa expuxo dúas en concreto, unha fronte a San Cibrao (Cervo) e outra en Cedeira".
"No seu día pedimos a situación desas dúas zonas e déronnos información nesgada. Déronnos coordenadas XY, que son coordenadas de terra, e pedímoslles lonxitude e latitude. Ao final mandáronnolas e demostrámoslles que esas son zonas de traballo, de arrastre, cerco, artes menores e litoral", subliña o presidente da Federación Nacional de Confrarías, para advertir que suporía a "perda" de "moitos postos de traballo".
Basilio Otero constata finalmente que desde hai 20 anos "a frota española reduciuse á metade", e que esa presenza de parques eólicos aínda incidiría máis neste descenso.
Cómpre lembrar que o pasado novembro unha trintena de confrarías galegas, asturianas e cántabras asinaron en Burela un manifesto advertindo das súas "liñas vermellas" en relación aos proxectos mariños de renovábeis.